Ilinniarnertuunngorniarfinni inaarutaasumik misilitsinnerit inerneri kisitsisitigut paasissutissani malinnaavigineqarsinnaalissapput. Taamatullu atuartut qanoq merlatigisut faginik assigiinngitsunik qaffasissusilinnik ingerlatsisimanerat malinnaavigineqarsinnaalissalluni
Kisitsisitigut paasissutissani ilinniarnertuunngorniarfinni ilinniartut misilitsinnerminni allagartaat Kalaallit Nunaanni ilinniarnertuunngorniarfinnit aaneqarsimasut tunngavigineqarput.
Misilitsinnermi allagartaq tunngavigalugu ilinniartumut ataasimut agguaqatigiissitsinermi uuttuummik naatsorsuisoqarpoq. Faginut tamanut ilinniartup ingerlassimasaanut uuttuuteqarpoq kiisalu karakteereqarluni. Tamanna misilitsinnermi allagartami allaqqavoq. Karakteerit tamarmik immikkut ataatsimut inernerisa kiisalu taakku uuttuutaasa ataatsimut kisinnerisigut taakkulu uuttuutit ataatsimut inernerannik agguarneqarneratigut agguaqatigiissitsinermi uuttuut naatsorsorneqarpoq. Agguaqatigiissitsinermi uuttuut 1,03‐mik amerlisarneqarpoq atuartoq A‐mik qaffasissusilinnik faginit pingasunik ingerlatsisimappat imaluunniit 1,06‐imik amerlisarneqarluni atuartoq A‐mik qaffasissusilinnik faginik pingasunit amerlanerusunik ingerlatsisimappat. ECTS‐imi naqinnerit tunngavigalugit karakteeriliinerit kisitsisit arfineq‐marluk aallaavigalugit karakteerilersuinermut nuunneqarput, nalunaarsuutillu karakteerinngortinneqarsinnaanngitsut naatsorsuinermi ilanngunneqanngillat. Ukiumoortumik karakteerit aamma inaarutaasumik karakteerit naatsorsuutini ilaapput. Misilitsinnermi allagartani paasissutissat allaqqasut atorlugit agguaqatigiissitsinermi uuttuut kisinneqarpoq. Ilinniarnertuunngorniarfinnit paasissutissanut pineqartunut naqqiissutit tunngavigineqanngillat.
Ilinniartut qanoq amerlatigisut ilinniarnertuunngorniarfinni faginik neqeroorutigineqartunik assigiinngitsunillu qaffasissusilinnik ingerlatsisimanerat immikkut naatsorsorneqarput. Fagit A‐,B‐ aamma C‐mik qaffasissusillit neqeroorutigineqarsinnaapput A‐millu qaffasissusillit qaffasinnerpaatut inissisimapput. Misilitsinnermi allagartami takuneqarsinnaavoq fagit taakkulu qaffasissusaat ilinniartumit ingerlanneqarsimasut. Fagit qulaani allanneqareersutut qaffasissusilerneqarsimanngitsut naatsorsuutini ilaanngillat. Fagilli assigiinngitsut qaffasissusilerneqarsimasullu tamarmik ilaapput. Ilinniartoq ukiumi misilitsiffiusumi fagip ataatsip iluani qaffasissutsini arlalinni nalunaarsorsimappat fagi ataasiaannarluni naatsorsuiffigineqassaaq fagimi qaffasissutsit qaffasinnerpaartaanni, karakteeriliinerillu arlaqarsimappata qaffasinnerpaamik karakteeriliivigineqarsimasumi. Naatsorsuineq misilitsinnermi allagartani faginik qaffasissusaannillu (A, B aamma C) katitikkanik imaqarpoq. Ilinniarnertuunngorniarfinni neqeroorutaangitsumik fagimik qaffasissusilerneqarsimasumik naatsorsuinermi ilaasoqarsinnaaneranik tamanna isumaqarpoq.
Naatsorsuutini tamani ilinniartut ilanngunneqarput, karakteerii karakteeriisalu agguaqatigiissinnerannut uuttuinerit apeqqutaatinnagit. Ilinniartulli misilitsinnermi karakteereqanngitsut, assersuutigalugu naammassinnissimannginnerat peqqutaalluni, misilitsinnermi allagartat nalunaarsuuteqanngitsut assigalugit, ilanngunneqanngillat.
Kisitsisitigut paasissutissani inaarutaasumik karakteerit agguaqatigiissinneri kisinneqarput kiisalu ilinniarnertuunngorniarfinnut, suiaassutsinut aamma ukiunut immikkoortiterneqarlutik. Uuttuut appasinnerpaaq (0‐1,99) agguaqatigiissitsinernik minus‐inik ilisarnaatilinnik aamma imaqarpoq, uuttuullu qaffasinnerpaaq (10‐12) agguaqatigiissitsinernik 12,72 tikillugu annertussusilimmik imaqarluni. Taassuma saniatigut fagit qaffasissusaat malillugit agguataarsimasut kisitsisitigut paasissutissiarineqarput. Qallunaat ilinniarnertuunngorniarfiinit fagit naammassineqarsimasut kisitsisini pineqartuni ilanngunneqanngillat, agguaqatigiissilluguli karakteerit kisitsisaanni ilaapput.
Atuartut amerlassusaat kisitsisini matumani pineqartut kisitsisaataasivimmi ilinniartut amerlassusaannut Kalaallillu Nunaanni ilinniarnertuunngorniarnermik naammassinnissimasut kisitsisaannit annertunngitsunik allaanerusinnaapput. Taaneqartunut kingullernut nalunaarsuutit tunngaviusut piffissap ingerlanerani kingumoortunik allannguuteqarsimasinnaanerat pillugu ataavartumik naqqissorneqartarnerinik tamanna peqquteqarpoq.
Naatsorsuinerni misilitsinnermi allagartat ilinniarnertuunngorniarfinnit nalunaarutigineqarsimasut tunngavigineqarput. Ilinniartut angusisimanngitsut tamarmik nalunaarutigineqasimanersut misissorneqanngilaq. Uuttuummi appasinnerpaami (0‐1,99) ilinniartut ikittuinnaapput, tamannalu eqqumaffigineqassaaq.
Kalaallit Nunaanni ilinniarnertuunngorniarfinnit Naatsorsueqqissaartarfimmut tunniunneqarsimasuni nalunaarsuutit kukkusunik amigartunilluunniit imaqarsinnaanerat eqqumaffigineqassaaq.