Nalunaarsuutit tunngaviusut
Ilinniartitaanermut kisitsisitigut paasissutissani Ilinniagaqarnersiuteqartitsivimmit (USF) nalunaarsuutit tunngavigineqarput. Nalunaarsuiffik ilinniakkanik ilinniagaqarnersiuteqarfigineqarsinnaasunik taamaallaat imaqarpoq. Kalaallit Nunaanni ilinniakkat qallunaanit ingerlanneqartut nalunaarsuutaat (politiinngorniarneq isertitsivinnilu nakkutilliisunngorniarneq) aammalu suliffeqarfiit namminneq ilinniakkat ingerlataat nalunaarsuutini ilaanngillat.
Periaaseq
Nalunaarsuutit atunnginnerini Naatsorsueqqissaartarfimmit misissoqqissaarneqarlutik, nalilersorneqarlutik aamma suliareqqinneqarput.
2025-mi kisitsisitigut paasissutissat USF-imi nalunaarsuutit nutaat tunngavigalugit piffissaq kingumut uterlugu naqqissorneqarput. Tamanna periaatsip ataani immikkut nalunaarusiami ” Teknisk notat 1. Sammensætning af uddannelsesforløb”-imi annertunerusumik atuarneqarsinnaavoq.
Naatsorsuineq
Ilinniartitaanermut kisitsisitigut paasissutissani naatsorsuinermi ukioq atuarfiusoq malinneqarpoq. Ilinniartunulli ilinniakkamik ingerlatsisunut naatsorsuinermi tamanna atunngilaq, tassani naatsorsuinermi ulloq 31/12 tunngavigineqarpoq.
Ilinniartitaanermi kisitsisitigut paasissutissani ilinniakkamik ingerlatsineq uuttuutitut atorneqarpoq. Ilinniakkamik ingerlatsinerit amerlassusaat ilinniartullu amerlassusaat tassani assigiinngillat. Assersuutigalugu ukiup kisitsiviusup ataatsip ingerlanerani ilinniartoq ilinniakkamik aallartitsisinnaavoq, taannali unitseriarlugu ilinniakkamik nutaamik aallartitsisinnaalluni. Taamaasilluni aallartitsisimasunut nalunaarsuutini marloriarluni kisinneqassaaq. Ilinniartunut ilinniakkamik ingerlatsisunut nalunaarsuinermi taamaallaat ilinniakkanik ingerlatsinerit aamma ilinniartut amerlassusaat ataqatigiipput.
Ilinniakkanut ingerlanneqartunut kisitsisitigut paasissutissani tabelit ilinniakkanik aallartitsinernik, ingerlatsinernik aamma naammassinninnernik ilinniakkat qaffasissusaannut, suiaassutsinut ukiunullu immikkoortiterneqarsimasunik imaqarput.
Kisitsisit paasissutissat immikkoortiterneqarput:
· Nuna ilinniarfik malillugu ilinniakkanik ingerlatsinerit
· Atuarfik ilinniagarlu malillugit Kalaallit Nunaanni ilinniakkanik ingerlatsinerit
Naatsorsueqqissaartarfimmi ilinniartitaanermut kisitsisitigut paasissutissat UNESCO-p nunat tamalaat akornanni malittarisassiaa ISCED2011 malillugu immikkoortiterneqarput.