Soraarummeernermi uppernarsaat tunngavigalugu ilinniartumut ataasimut agguaqatigiissitsinermi uuttuummik naatsorsuisoqarpoq. Faginut tamanut ilinniartup ingerlassimasaanut uuttuuteqarpoq kiisalu karakteereqarluni. Tamanna soraarummeernermi uppernarsaammi allaqqavoq. Karakteerit tamarmik immikkut ataatsimut inernerisa kiisalu taakku uuttuutaasa ataatsimut kisinnerisigut taakkulu uuttuutit ataatsimut inernerannik agguarneqarneratigut agguaqatigiissitsinermi uuttuut naatsorsorneqarpoq. Agguaqatigiissitsinermi uuttuut 1,03-mik amerlisarneqarpoq atuartoq A-mik qaffasissusilinnik faginit pingasunik ingerlatsisimappat imaluunniit 1,06-imik amerlisarneqarluni atuartoq A-mik qaffasissusilinnik faginik pingasunit amerlanerusunik ingerlatsisimappat. Ukiumoortumik karakteerit aamma inaarutaasumik karakteerit naatsorsuutini ilaapput. Soraarummeernermi uppernarsaatini paasissutissat allaqqasut atorlugit agguaqatigiissitsinermi uuttuut kisinneqarpoq. Ilinniarnertuunngorniarfinnit paasissutissanut pineqartunut naqqiissutit tunngavigineqanngillat.
Ilinniartut qanoq amerlatigisut ilinniarnertuunngorniarfinni faginik neqeroorutigineqartunik assigiinngitsunillu qaffasissusilinnik ingerlatsisimanerat immikkut naatsorsorneqarput. Fagit A-,B- aamma C-mik qaffasissusillit neqeroorutigineqarsinnaapput A-millu qaffasissusillit qaffasinnerpaatut inissisimapput. Soraarummeernermi uppernarsaammi takuneqarsinnaavoq fagit taakkulu qaffasissusaat ilinniartumit ingerlanneqarsimasut. Fagit qulaani allanneqareersutut qaffasissusilerneqarsimanngitsut naatsorsuutini ilaanngillat. Fagilli assigiinngitsut qaffasissusilerneqarsimasullu tamarmik ilaapput. Tamannalu isumaqarpoq fagimik qaffasissusilerneqarsimasumik, ilinniarnertuunngorniarfimmili neqeroorutaasimanngitsumik, naatsorsuutit imaqarsinnaanerat.
Naatsorsuutini tamani ilinniartut ilanngunneqarput, karakteerii karakteeriisalu agguaqatigiissinnerannut uuttuinerit apeqqutaatinnagit.
Kisitsisitigut paasissutissani inaarutaasumik karakteerit agguaqatigiissinneri kisinneqarput kiisalu ilinniarnertuunngorniarfinnut, suiaassutsinut aamma ukiunut immikkoortiterneqarlutik. Taassuma saniatigut fagit qaffasissusaat malillugit agguataarsimasut kisitsisitigut paasissutissiarineqarput. Qallunaat ilinniarnertuunngorniarfiinit fagit naammassineqarsimasut kisitsisini pineqartuni ilanngunneqanngillat, agguaqatigiissilluguli karakteerit kisitsisaanni ilaapput.
Atuartut amerlassusaat kisitsisini matumani pineqartut kisitsisaataasivimmi ilinniartut amerlassusaannut Kalaallillu Nunaanni ilinniarnertuunngorniarnermik naammassinnissimasut kisitsisaannit annertunngitsunik allaanerusinnaapput. Taaneqartunut kingullernut nalunaarsuutit tunngaviusut piffissap ingerlanerani kingumoortunik allannguuteqarsimasinnaanerat pillugu ataavartumik naqqissorneqartarnerinik tamanna peqquteqarpoq.
Kalaallit Nunaanni ilinniarnertuunngorniarfinnit Naatsorsueqqissaartarfimmut tunniunneqarsimasuni nalunaarsuutit kukkusunik amigartunilluunniit imaqarsinnaanerat eqqumaffigineqassaaq.