Efterskolernerit

Efterskolernermik naammassinnittut

Ataatsimut isigalugit 350-it efterskolernermik aallartitsisimapput, 130-illu unitsitsisimallutik. Tassani naammassinnittarnermut pct.-i 63-imiippoq, ukiut siuliini 70-it 75-illu akornanni inissisimasarsimasoq.

Ukioq atuarfiusut 2020/21 aammalu 2021/22 nunarsuaq tamakkerlugu nappaassuarmit tuniluuttumit COVID-19-imit sunnernera suli atuuppoq.

Titartagaq 1. 2015/16-imiit 2023/24-mut efterskolernerit aallartinneqartut amerlassusaat, atuarfik malillugu

Najoqqutaq: Naatsorsueqqissaartarfik – Kisitsisaataasivimi kisitsisit takukkit (https://bank.stat.gl/UDNESF).

Efterskole Villads Villadsen-i atuartunut 80-inut inissaateqartoq Maniitsumilu Efterskoli atuartunut 70-inut inissaateqarluni. Atuartulli efterskolini aallartittut amerlassusaat inissaqartitsinermit amerlanerusinnaapput, unitsitsisoqartillugu atuartut nutaat aallartissinnaasarmata.

2023/24-mi Kalaallit Nunaanni efterskolernerit aallartinneqartut amerlassusaat ukiup siulianit aallartittunit amerlanerupput, tassani Efterskole Villads Villadsen-imi 63-it aallartissimallutik, Maniitsumi Efterskolimi 54-it aallartittut. 2023/24-mi qallunaat efterskoliini aallartittut ukiup siulianut sanilliullugit 59-inik amerleriarsimapput.

Efterskolernermik aallartitsisut ukiui

Amerlanerpaat ukiumi 16-inik ukioqalerfimminni efterskolernermik aallartitsisarput, amerlasuullu meeqqat atuarfianni naammasserlaajusarlutik. Ukiumi atuarfiusumi 2023/24-mi atualertut 72 pct.-ii ukiumi 16-iliiffimminni aallartissimasut 7 pct.-ii inuusunnerupput. Taamaallaat Danmarkimi inuusuttut 16-it inorlugit ukiullit efterskolernermik aallartitsisinnaapput.

16-inik ukioqalereersimallutik efterskolernermik aallartitsisartut amerlassusaat 2023/24-mi 21 pct.-iusimapput.

Titartagaq 2. 2015/16-imiit 2023/24-mut efterskolernerit aallartinneqartut, ukiut malillugit

Nalunaarut: Ukiup pineqartup naanerani atuartut ukiui malillugit naatsorsuisoqarpoq.

Najoqqutaq: Naatsorsueqqissaartarfik – Kisitsisaataasivimi kisitsisit takukkit (https://bank.stat.gl/UDNESE).

Efterskolernerni unitsiinnartarneq

Ukiumi atuarfiusumi 2023/24-mi atuartut 220-t efterskolernermik naammassinnissimapput, efterskolernerit aallartinneqarsimasut 63 pct.-iinik annertussusillit. Tamanna ukiup siulianut naleqqiullugu 7 pct. point-inik appariarneruvoq.

2023/24-mi Efterskole Villads Villadsen-imi naammassinnittarnermut pct.-i 49 pct.-iusimavoq, piffissamilu pineqartumi Maniitsumi Efterskoli-mi 28 pct.-iusimalluni.

Kalaallit Nunaanni efterskolinut sanilliullugit qallunaat efterskoliinit naammassisartut procentii nikissimanngillat, 2023/24-milu 75 pct.-iulluni. Tamanna ukiup siulianut, 75 pct.-iusimasumut, naleqqiullugu nikinngilaq.

Titartagaq 3. 2015/16-imiit 2023/24-mut naammassinnittarnermut procenti, efterskolit malillugit

Najoqqutaq: Naatsorsueqqissaartarfik – Kisitsisaataasivimi kisitsisit takukkit (https://bank.stat.gl/UDNESF).

Efterskolernermik aallartitsisartut naammassinnittartullu

Ataani takuneqarsinnaapput 2001-imiit 2007-imut ukioqatigiiaat, ukiuni atuarfiusuni 2016/17-imi kiisalu 2023/24-mi efterskolernernik aallartitsisimasut naammassinnissimasullu.

Titartagaq 4. Ukioqatigiinni efterskolernermik aallartitsisimasut/naammassinnissimasut amerlassusaat, 2001-imiit 2007-imut ukiut malillugit

Najoqqutaq: Naatsorsueqqissaartarfik – Kisitsisaataasivimi kisitsisit takukkit (https://bank.stat.gl/UDNESE).

Inuusuttut 2007-imi inunngorsimasut 35 pct.-ii efterskolernermik aallartitsisimapput, 23 pct.-iilu efterskolernermik naammassinnissimallutik. Ukioqatigiinni inuit amerlassusaat 2001-imi 817-iniit 2007-imi 733-nut ikileriarsimapput.