Ilinniakkap naammassereernerata kingorna nuna najugaq

Ilinniakkamik naammassisaqartartut amerliartortillugit, nunamut allamut ilinniariarlutik aallartartut aamma amerliartorput. Pingaartumik ingerlariaqqiffiusumik ilinniarfinni ilinniartut aallartarput, Kalaallit Nunaanni ilinniakkat amerlasuut ingerlanneqarsinnaanngimmata. 2003-miit nunami allami ingerlariaqqiffiusumik ilinniakkamik aallartitsisartut 2023-mi amerlassusaat 18 pct.-imik qaffariarsimavoq.

2023-mi ingerlariaqqiffiusumik ilinniakkamik ingerlatsisut tamakkerlutik 28 pct.-ii nunami allami ilinniartuupput. Ilinniakkap naammassereernerata kingorna ilinniartut ilaat angerlartarput, ilaalli nunani allaniiginnartarput.

Nunani allani ilinniartut

Piffissami 2003-miit 2023-mut inuussutissarsiornermi ilinniakkamik naammassisaqareernerup kingorna ukioq siulleq ilinniartut agguaqatigiissillugu 63 pct.-ii suli nunani allani najugaqarput. Taakkunannga 21 pct.-it ingerlariaqqillutik ilinniartuupput. Amerlanertigut ilinniartut bacheloritut naammassereernerup kingorna kandidatinngorniarlutik ilinniaqqittarput. Titartagaq 1.-imittaaq takuneqarsinnaavoq ilinniakkamik naammassinnereernerup kingorna ukiuni siullerni marlunni ingerlariaqqiffiusumik ilinniakkanik ingerlatsisut amerlanerusut. Ingerlariaqqiffiusumik ilinniakkanik ingerlatsisut annertussusaata appariartornerani Kalaallit Nunaannut utertartut annertussusaat qaffakkiartorpoq.

Titartagaq 1. Ukiut 1-10 nunami allami ilinniakkap naammassinerata kingorna

Nalunaarut: Inuussutissarsiornermi ingerlariaqqiffiusumillu ilinniakkat kisimik pineqarput.

Najoqqutaq: Naatsorsueqqissaartarfik – Kisitsisaataasivimmi kisitsisit takukkit (https://bank.stat.gl/UDNBD1)

Nunami allami ilinniakkamik naammassisaqareernerup kingorna ukiumi siullermi ilinniartut 37 pct.-ii Kalaallit Nunaanni najugaqarput. Kalaallit Nunaannut utertartut najugaqalersartullu annertussusaat ukiuni tulliini qaffakkiartortarput. Ilinniakkamillu naammassisaqareernerup kingorna Ukiut arfineq-pingasut qaangiunnerini amerlanerpaallutik. Tassani nunami allami ilinniakkamik naammassisaqareernerup kingorna ilinniartut agguaqatigiissillugu 56 pct.-ii Kalaallit Nunaanni najugaqalersimasarput.

Kalaallit Nunaannut utertartut annertussusaat taamaaginnarpoq

Piffissaq sivisooq najoqqutaralugu sanilliussinermi, ukiut tamaasa nunami allami ilinniakkamik naammassisaqartartut amerlannginnerat eqqumaffigineqartariaqarpoq. Nalunaarsuutit ukiuni ataasiakkaani nikerarnernut qajannaannerulersinniarlugit ukiut pingasukkaarlugit agguaqatigiissitsinerit atorneqarput.

Ukiut kingulliit ingerlanerini nunami allami ilinniakkamik naammassisaqareernerup kingorna Kalaallit Nunaanni najugaqalersartut annertussusaat annertuumik allannguuteqarsimanngilaq. Ilinniakkap naammassereernerata kingorna ukiut siulliit 1-2 ingerlanerini annikitsunik assigiinngissuteqartoqarpoq. Ukiulli pingajussaanniit naligiileqqittarput. Taamaattumik nunanut allanut ilinniariarlutik nuuttartut amerlaneruleraluartut, Kalaallit Nunaannut utertartut annertussusaannut tamanna sunniuteqanngilaq.

Titartagaq 2. Nunami allami ilinniakkap naammassereerneranit Kalaallit Nunaanni najugallit annertussusaat; 2007-imiit 2018-imut ukiut pingasukkaarlugit naatsorsukkat

Nalunaarut: inuussutissarsiornermi ingerlariaqqiffiusumillu ilinniakkat kisimik pineqarput.

Najoqqutaq: Naatsorsueqqissaartarfik – Kisitsisaataasivimmi kisitsisit takukkit (https://bank.stat.gl/UDNBD1)

Kalaallit Nunaanni ilinniartut

Ilinniartut Kalaallit Nunaanni inuussutissarsiornermi imaluunniit ingerlariaqqiffiusumik ilinniarnermik naammassinnissimasut nunami allami ilinniakkamik naammassinnissimasuniit amerlanertigut Kalaallit Nunaanniiginnartarput. Ukiullu qulit qaangiunnerini agguaqatigiissillugu 89 pct.-ii suli tamaani najugaqartarput. Ilinniareernerulli kingorna Kalaallit Nunaanniiginnartartut annertussusaat ukiuni tamani appariartorpoq.

Titartagaq 3. Kalaallit Nunaanni ilinniakkap naammassereerneranit ukiut 1-10 qaangiunnerini Kalaallit Nunaanni najugallit annertussusaat, 2003-2023

Nalunaarut: inuussutissarsiornermi ingerlariaqqiffiusumillu ilinniakkat kisimik pineqarput.

Najoqqutaq: Naatsorsueqqissaartarfik – Kisitsisaataasivimmi kisitsisit takukkit (https://bank.stat.gl/UDNBD1)