Siunertaq
Kisitsisini paasissutissani matumani siunertaavoq ilinniarnertuutut naammassisimasut qanoq amerlatigisut ukiut 1-10 ingerlanerini ingerlariaqqiffiusumik ilinniakkanut ingerlaqqittarnerisa naammassinnittarnerisalu kisinneqarnissaat.
Nalunaarsuutit
tunngaviusut
Piffissami 2003-miit ullumikkumut ilinniakkanik aallartitsisunut, ilinniakkanik ingerlatsisunut ilinniakkanillu naammassinnissimasunut nalunaarsuisarfiit tunngavigalugit kisitsisitigut paasissutissat suliarineqarput.
Siornatigut ilinniarnertuunngorniarneq ukiumik ataatsimik sivisussuseqartoq inersimasunut ilinnialernissamut pikkorissarnertut ingerlanneqartartoq nalunaarsuutini tunngaviusuni ilanngunneqanngilaq.
Periaaseq
Ilinniarnertuunngorniarnermik naammassinnissimasut ukioq naammassiffigisimasaannit ukiut 1-10 qaangiunnerini ilinniakkamik aallartitsisimasut, naammassinnissimasut sulilu ingerlatsisut nalunaarsuisarfiini ataatsimut ingerlanneqarput.
Ilinniakkani
ingerlaqqiffiusuni inuussutissarsiornermi ilinniakkatut assigisaannilluunniit
qaffasissusillit kisimik naatsorsorneqarput. Taamaattumillu
ilinniarnertuunngoreernermi inuussutissarsiornermi ilinniakkamik
aallartitsinissamut tunngaviusumik ingerlatat piareersarlunilu pikkorissarnerit
ilinniakkamik aallartitsinertut naatsorsuutini ilanngunneqanngillat.
Ukiut
tamaasa ukiumi pineqartumi ilinniartut suli ilinniakkamik ingerlatsisutut
imaluunniit ukiut kingulliit ilaanni ilinniakkamik naammassinnissimasutut
killiffilerneqartarput. Ilinniartut suli ilinniakkamik ingerlatsisutut
imaluunniit naammassinnissimasutut nalunaarsorneqarsimanngitsut
”unitsitsisimasutut” killiffilerneqarput. Ilinniarnertuunngoreernerup kingorna
ilinniakkamik aallartitsisimanngitsut ”aallartitsisimanngitsutut”
killiffilerneqarput.
Killiffiliinermut
piffissaq
Ilinniarnertuunngorniarnermik
naammassinnereernermi ukiut qaangiuttut amerlassusaannut atorneqarpoq,
ilinniakkap killiffia 31. decembarimi naatsorsorlugu.
Ilinniakkap
qaffasissusaa
Ilinniakkat
qaffasissusaat International Standard Classification of Education 2011-meersoq
malillugu immikkoortiterneqarput. Naatsorsueqqissaartarfiup ilinniartitaanerup
iluani taaguutit pillugit saqqummersinnikuusaani ilinniakkami pineqartumi
imaluunniit ISCED-i malillugu immikkoortiterinermi
ilinniakkat suut pineqarnersut takuneqarsinnaapput. Taassuma saniatigut
Naatsorsueqqissaartarfik Kalaallit Nunaanni ilinniakkat, ilinniakkap
qaffasissusaa malillugu, immikkoortiternerat takussutissiaraa. Taaguutit
takussutissiarlu www.stat.gl –imi Ilinniartitaanermut tunngasut ataanni
nassaarineqarsinnaavoq. Saqqummersitami kingullerpaami Periaatsimut
immikkoortoq takuuk.
Ilinniakkap
killiffia
Ukiup kisitsiviusup naanerani ilinniartup ilinniarnermi killiffianut atorneqarpoq. Ilinniakkap killiffiani naatsorsuutit atorneqartut tassaapput:
· suli ingerlatsineq
· naammassinnissimaneq
· unitsitsisimaneq
· aallartitsisimannginneq
Naatsorsuineq
Ilinniarnertuunngorniarnermiit ingerlariaqqiffiusumik ilinniakkanut ingerlaqqittut kisitsisitigut paasissutissaat ilinniarnertuunngoreernerup kingorna ukiut 1-10 qaangiunnerini suli ingerlatsisut, naammassinnissimasut, unitsitsisimasut imaluunniit aallartitsisimanngitsut amerlassusaattut naatsorsorneqarput.
Tabelit ilinniakkap aallartissimasap qaffasissusaannut, ilinniarnertuutut naammassiffinnut suiaassutsinullu naatsorsorneqarput.
Killiliinerit
erseqqissagassallu
”Unitsitsinermut” killiffimmi ilinniakkamik unitsitsigallartut ilaapput.
Kisitsisitigut
paasissutissani ilinniarnertuunngorniarnermik naammassinnissimasut
tunngavigineqarput. Kalaallit Nunaannit nuussimasut Kalaallit Nunaannilu
ilinniagaqarnersiuteqartitsivik avaqqullugu ilinniagaqarsimasut
“aallartitsisimanngitsunut” killiffimmi ilaapput.
Kisitsisaataasivimmi
tabelini inuk ataaseq ataasiaannarluni naatsorsorneqarpoq. Tamanna ilinniakkap qaffasissusaani pineqartumi inuit tamakkerlutik
ilaatinneqannginnerannik isumaqarpoq. Assersuutigalugu siornatigut
inuussutissarsiornermik ilinniakkamik naammassinnissimasut ingerlariaqqiffiusumillu
ilinniakkamik aallartitsisut, ingerlariaqqiffiusumik ilinniakkani “suli
ingerlatsisutut” killiffilerneqarput. Taamatuttaaq siornatigut
inuussutissarsiornermik ilinniakkamik naammassinnissimasut
ingerlariaqqiffiusumillu ilinniakkamik unitsitsisut, inuussutissarsiornermik
ilinniakkat ataanni “naammassinnissimasutut” killiffilerneqarput.