Illersornissaq

Illersornissaq qallunaat naalagaaffiata ataani inissisimavoq. Namminersorneq pillugu inatsimmi allassimavoq illersornissamut suliassaqarfik suliassaqarfiit Namminersorlutik Oqartussanit tiguneqarsinnaanerannik periarfissaanngitsut ilaanniittoq.

 

Sakkutooqarfik (Grønlands Kommando) Arsuup kangerluani Kangilinnguani inissisimanikuuvoq. Sakkutooqarfillu 31.oktobari 2012 aallarnerfigalugu matuneqarpoq. Taarsiullugu Issittumi Sakkutooqarfik (Arktisk Kommando) Nuummi siulersuisoqartoq pilersinneqarpoq. Issittumi Sakkutooqarfik Forsvarkommando ataani inissisimavoq, taamatullu Issittumi Sakkutooqarfiup pisortaa illersornissamut pisortap ataani inissisimalluni.

 

Kalaallit Nunanni sumiiffinni kiffartuussinerit ataani taaneqartut Issittumi Sakkutooqarfiup pisortaata akisussaaffigai. Tassani pineqarput Station Nord, Slædepatruljen SIRIUS Danebrog-imi immikkoortortaqarfeqartoq, Forsvarets Vagt Mestersvig. Luftgruppe Kangerlussuarmi aammalu Logistik Center Grønland Aalborgimi timmisartoqarfeqartoq. Taamatuttaaq Issittumi Sakkutooqarfik Thule Air Base-mut attaveqarpoq.

 

Issittumi Sakkutooqarfiup pingaarnertut suliassaraa sorsunneqannginnerup nalaani nakkutiginninneq aammalu namminersortuunermik malunnartitsineq. Suliassalli allat akornanni taaneqarsinnaapput aalisarnermik nakkutilliineq, ujaasineq aammalu annaassiniaaneq, imartami avatangiisinut nakkutilliineq aammalu mingutsitsinermut akiuiniarneq, tatsinik uuttortaaneq aammalu Kalaallit Nunaanni inuiaqatigiinnut ikiuineq.

 

Slædepatruljen SIRIUSip namminersortuunerup malunnartinnera, politiitut oqartussaalluni ilisimasassarsiortunik aammalu nunami allanngutsaaliukkami eqqissisimatitaanissamik aalajangersakkanik nakkutilliinerit taamatullu sumiiffimmi nakkutiginninneq suliassarai.

 

Station Nordip pingaarnertut suliassaraa Kalaallit Nunaanni illersornissamut suliassaqarfinni, tassani ilaatigut Slædepatruljen SIRIUS aammalu Luftgruppe Vest tapersersorniarlugit ukioq kaajallallugu mittarfiup aammalu unnuisarfiit piareersimatinnissaat. Taamatuttaaq Station Nord qallunaat sumiiffimmi namminersorlutik ingerlatsinerannut ataavartitsinermi peqataavoq. Tassani Kalaallit Nunaanni politimesteri sinnerlugu Nunami allanngutsaaliukkamut tikeraartunut, amerlanertigut Station Nord aqqutigalugu ingerlaqqittussatut aqqusaartunut, politiitut oqartussaaneq ingerlanneqarpoq. Aammattaaq Station Nord Kalaallit Nunaata avannaata kangiani ilisimatusarnikkut ingerlatanut tamanut ikiuisarpoq taamatullu Danmarks Meteorologiske Institutimut aammalu Danmarkimi avatangiisinut misissuinernut (Danmarks Miljøundersøgelser) nalunaarsuutinik katersisarluni.

 

Forvarets Vagt Mestersvig atortunik pilersuisutut inissisimavoq, tassani sulisut marluk ukioq kaajallallugu sumiiffimmi ingerlatsisarput. Suulluunniit iluarsaassinerit tamarmik, pilersueqqinnerit, qamutinik sunilluunniit ingerlassinerit, timmisartunik suliaqarnerit, radiukkut kiffartuussinerit aammalu ilisimasassarsiortunik il.il. nakkutiginninnerit tassani suliarineqartarput.

 

Nittartakkat

Illersornissaq pillugu nittartakkami: http://www2.forsvaret.dk/ annertunerusumik atuartoqarsinnaavoq.

 

Takussutissaq 6.1. Illersornissaqarfiup Kalaallit Nunaanni suliassaqarfinnut ukiumut aningaasartuutai

 

2005

2011

2012

2013

2014

2015

 

Mio. kr.

Aningaasartuutit katillugit

228

499

581

382

408

354

Aalisarnermik nakkutilliinermi katillugit

159

387

435

285

295

221

- Aalisarnermut nakkutilliineq Søværnet 1)

111

309

349

203

204

178

- Aalisarnermut nakkutilliinermi ikiuinerit Søværnet 2)

13

12

18

11

12

9

- Aalisarnermut nakkutilliineq Flyvevåbnet 3)

12

66

68

71

79

34

- Aalisarnermut nakkutilliinermi ikiuinerit Flyvevåbnet 4)

23

-

-

-

-

-

Kalaallit Nunaanni Sakkutooqarfik 5)

47

80

104

81

95

115

Sirius il.il.

17

22

27

11

16

12

Mittarfiit

4

10

15

5

2

6

Malugiuk: 2013-imi kisitsisit tamarmik pingaarnertut sulianut, tassani nakkutiginninnermut aammalu namminersortuulluni ingerlanermut, aalisarnermut nakkutilliinermut aammalu ujaasinermut annaassiniarnernullu aningaasartuutinik tamakkiisunik imaqarput. Taamatuttaaq ilaapput sakkutooqarfinni kiffartuussinerit, sikunik alapernaarsuinerit, avatangiisimut nakkutiginninnermi peqataanerit aammalu mingutsitsinermut akiuiniarnerit, tatsinik uuttortaanerit il.il. Kisitsisittaaq tamarmik akissarsianik aammalu aningaasartuutinik allanik imaqarput.

Flyvevåbnet atorlugu aalisarnermut nakkutilliinermi ikiuilluni sullissisut akilerneqarput taamatullu ingerlataq aningaasartuutitut naatsorsorneqarluni. Siriuspatruljen aammalu Station Nord aaqqissuussaanikkut Issittumi Sakkutooqarfimmut ilaatinneqarput. Atortunik soorlu umiarsuarnik timmisartunillu taamaatitsinerit aammalu aserfallatsaaliuinerit ukiut ingerlanerini annertuumik nikingassuteqalertitsisinnaapput, assersuutigalugu nakkutilliinermi umiarsuarnik iluarsaassinerit aammalu aserfallatsaaliuinerit marlunnik kisitsisitalinnik millionit nalinginik allanngorarsinnaapput.

Nalunaarut:

1) Toqqaannartumik toqqaannanngitsumillu umiarsuarnut aningaasartuutinik imaqarput, ilaatigut taamaatitsinernik aammalu aserfallatsaaliuinernik. Søværnimi angallatit atorunnaarsinneqarput nakkutilliinermullu angallatinik anginerusunik aammalu ingerlatsinermi akisunerusunik taarserneqarput, tamannalu aningaasartuutit tamakkiisut katinnerini malunnartumik qaffariaammik kinguneqarluni.

2) Allanut naleqqiullugu ingerlatseqatigiinnermi toqqaannartunik toqqaannanngitsunillu Chef og Eskadrestab-imut 1. Eskadre Frederikshavnimiittumut aningaasartuutinik imaqarput.

3) Allanut naleqqiullugu ingerlatseqatigiinnermi toqqaannartumik toqqaannanngitsunillu timmisartunut, qulimiguulinnut aammalu Air Transportimit Ålborgimiittumit ikiuinernik aningaasartuutinik imaqarput. Søværnets Helikoptertjeneste 1. januaari 2011 aallarnerfigalugu FTK-mut nuutsinneqarput.

5) Issittumi Sakkutooqarfiup ingerlatallu allat, SIRIUS aamma Station Nord minillugit, ingerlanneqarnerinut aningaasartuutinik tamanik imaqarput.

Najoqqutaq: Forsvarsministeriet