Nukissiuuteqarneq
Kalaallit Nunaat 1993-imili tamakkiisumiinngikkaluamik erngup nukinganik eqqakkanillu ikuallaanikkut nukissiornikkut imminut pilersortunngorpoq. Kalaallit Nunaannilu namminerisamik nukissiuuteqarneq suli annertusiartoraluartoq suli uulia avataanit eqqunneqartoq pinngitsoorneqarsinnanngilaq, pingaartumik Gas uulia, petruuliu aammalu beziina.
2009-mi ukiuni kingullerni arlaqartuni siullermeerluni nukissiuutinik atuineq annertuumik apparpoq, apparneranullu pissutaasoq pingaarnerpaaq tassaavoq Gas uuliamik innaallagissionerup kiassarnerullu annikillinera. Erngup nukinganik atuinerulerneq pissutaalluni nukimmik atuilussinnarneq annikillivoq. Uulia atorlugu nukissiuuteqarnermi uuliap ilarujussua atulussinnarneqartarpoq, erngup nukinga atorlugu nukissiuuteqarnermi nukissiaq annaasaq annikinnerusarluni. 2009-mi erngup nukinganik nukissiuuteqarneq annertusimmat, uulia atorlugu nukissiuusionermi uulia atulussinnagassaagaluaq millerujussuarpoq, tamanna titartakkami 1.1.-imi takuneqarsinnaavoq.
Uuliamik nukissiuuteqarnerup allanngorsaavigineqarnera 2010-mit 2015-imut suli ingerlanneqarpoq, taamaakkaluartoq ataatsimoorussamik nukissiuutinik atuineq malunnartumik 2010-mi 2011-milu annertuseriarpoq ujarassiornikkut aatsitsassarsiornikkullu misissuinerit, pingaartumik uuliamik misissuinermi annertuumik nukissiuutinik atuineq pisariaqartinneqarmat. 2010-mi 2011-milu arfineq pingasoriarluni uuliamik misissuinermi qillerisoqarpoq, qillerinerit misissuinermilu suliassat allat nuna tamakkerlugu nukissiuutinik atuinerup 20 pct. -iatut annertutigisumik atuisimapput.
2011-p kingorna uuliamik misissuinerit uninngatinneqarallarput taamaasillunilu 2012-imi Kalaallit Nunaata nukissiuutinik atuinera 2009-mitullusooq appaqqippoq. 2015-imi Kalaallit Nunaat tamakkerlugu nukissiuutinik atuineq 8.626 TJ-imut naatsorsugaavoq, 2014-imi nuna tamakkerlugu atuisimanermit 1,7 pct.-imik qaffasinneruvoq. Atsaat taamak annertutigaluni ataavartumik nukissiuutinit atuinerup 18,3 pct.-eraa.
Ataavartumik nukissiorneq gassinit kissatsitsisartunik piiaasunik nukissiornermut silaannaallu kissatsikkiartorneranut naleqqiullugu sunniuteqarpoq. Nukissiuutit nunap iluani pinngortartut, soorlu uulia, nukissiuutinik ataavartumik taarserneqarmata gassinik kissartitsisartunik piiaaneq annikillisissinneqarpoq.
Titartagaq 1.1. Kalaallit Nunaanni nukissiorneq nukissiuutinillu atuineq
Najoqqutaq: Naatsorsueqqissaartarfik
Nukik piujuartussaq erngup nukinganit imaluunniit seqernup nukinganit pinngortinneqartarpoq. Nukik piujuartussaq silaannarsuarmik kissatsitsisartuunngilaq, co2-millu aniatsitsisuunnani. Ikummatissat ass. orpiit allallu uumassusilimmit pinngortut alliartornerminni silaannarsuarmit co2-mik atuisimasut ikummatissatut atorneqaraangamik co2-mik aniatitsisarput.
Nukimmik atuineq angerlarsimaffinni atuinermut suliffeqarfiillu atuinerinut immikkoortillugu takuneqarsinnaavoq titartakkami 1.2-mi. Titartakkami tassani erserpoq nukimmik imermillu pilersuineq nukimmik atuinerup 34 procenterisimagaa. Atuiffiunerpaap tullerisimavaa nunalerineq, aalisarneq piniarnerlu nukimmik atuinerup 20 procentia taakkunani atorneqarsimavoq.
Assartuinermut angallasinermullu atuineq 18 procentimik atuiffiusimavoq angerlarsimaffillu nukimmik atuinerup 16 procentianik atuisimapput.
Innaallagiaq kiassarnerlu nukimmik imermillu pilersuinerup ataaniittut, atuisumut tuttarput nukissionernermi atorneqaratik. Taamaattumik suliffeqarfinni allani nukimmik titartakkami 1.2-mit takutinneqartumit atuineq annertuneruvoq. Titartakkami 1.3-mi takuneqarsinnaapput nukissiuutinit atuinerit tamakkerlugit agguataarneri.
Titartagaq 1.2. 2015-imi toqqaannartumik nukimmik atuineq angerlarsimaffinnut inuussutissarsiutinut immikkoortillugit
Najoqqutaq: Naatsorsueqqissaartarfik
Nukissiuutinit atukkat tamakkerlugit atuisartut, tassa suliffeqarfiit namminersortut, pisortaqarfiit suliffeqarfiutaat aamma angerlarsimaffiit atuinerisa inernerivaat. Nukissiuutinit ukununnga atuineruvoq; nioqqutissiat kiffartuussinerillu, ininik kissaanerit, qulliit allallu aamma assartuineq angallassinerlu. Nukissiuutinit atuinerunngitsut taakkununngalu ilanngunneqartartut tassaapput; tarngutit, saliinerit, bitumen aqqusinernut asfalterinermut aamma qalianut atorneqartartut. Nukissiuutinut nukiit atorneqartartut, saliineq aamma nukinnik nuussinerit atukkanut ilaanngillat.
Nukissiuutinit atuinerit tamakkeraanni angerlarsimaffinnut inuussutissarsiutinullu immikkoortinnerini, atorneqartup 29 procentia angerlarsimaffinnut atorneqarsimavoq atorneqartullu 22 procentia nunalerinermut, aalisarnermut aamma piniarnermut atorneqarsimavoq. Atukkap 21 procentia niuernermik inuussutissarsiutinut aamma kiffartuussinermik inuussutissarsiutinit atorneqarsimavoq atukkallu 20 procentia assartuinermut angallassinermullu atorneqarsimalluni. Atuinerup immikkoortitaarnera titartakkami 1.3-mi takuneqarsinnaavoq.
Titartagaq 1.3. 2015-imi nukissiuutinit atuinerup angerlarsimaffinnut aamma inuussutissarsiutinut immikkoortinneri
Najoqqutaq: Naatsorsueqqissaartarfik