Katersugaasiviit allagaateqarfillu
Kalaallit kulturiat kalaallillu inuiaat pillugit oqaluttuarisaanikkut takussutissartaat Nunatta Katersugaasivianit Allagaateqarfianniillu sumiiffinnilu katersugaasivinnit aqunneqarput.
Nunatta Katersugaasivia Allagaateqarfialu nuna tamakkerlugu itsarnisarsiornerup, eqqumiitsuliornerup kusanartuliornerullu iluini suliassaqarpoq.
Nunatta Allagaateqarfia Kalaallit Nunaanni pisortat suliffeqarfiutaannit inuinnarniillu allagaateqarfimmi toqqorneqartussanik tigusaqartarpoq, oqaluttuarisaanikkullu takussutissat nalunaarsorneqarlutillu paarineqartarput tamanullu takusassiarineqartarlutik. Allagaateqarfik januaarip aallaqqaataani 2014-imi ilisivinnik 4.183 meterinik takissuseqartuni toqqortaateqarpoq.
Nunatta Katersugaasivia Allagaateqarfialu pillugu paasissutisat erseqqinnerusut uani takuneqarsinnaapput: www.natmus.gl
Titartakkami 1.1-mi Nunatta Katersugaasivianut Allagaateqarfianullu 2014-imi isersimasut takutinneqarput. Ukiuni kingullerni arlaqartuni Nunatta Katersugaasivianut Allagaateqarfianullu isersimasut amerlassusaat tabel 1-imi takuneqarsinnaapput.
Illoqarfiit 15-it nammineerlutik katersugaasiveqarput, amerlanertigut nunasiaanerup nalaani illuutini oqaluttuarisaanermut attuumassuteqartuni.
Titartagaq 1.1. 2014-imi Nunatta Katersugaasivianut Allagaateqarfianullu isersimasut
Najoqqutaq: Nunatta Katersugaasivia Allagaateqarfialu
Nunatta isiginnaartitsisarfia
Nunatta Isiginnaartitsisarfiata anguniagaraa isiginnaartitsisarnerup iluani illuinnarsiortuunngitsumik eqqumiitsuliornikkut qaffasissumik pitsaassuseqartunik isiginnaartitsissutinik sanasarnissaq. Nunatta Isiginnaartitsisarfiata aallaavittut suliassai kalaallit kulturiannik ileqquinillu tunngaveqartussaapput peqataanillu meeqqaniit utoqqarnut tamatigoortumik oqariartuuteqarsinnaaneq isumagissallugu.
Nunatta Isiginnaartitsisarfiata suliai isiginnaartitsinerit aqqutigalugit kikkunnut tamanut saqqummiunneqartassapput, soorlu angalalluni isiginnaartitsiartornikkut, radiokkut tv-kullu aallakaatitsinikkut immiussanillu tuniniaanikkut.
Nunatta Isiginnaartitsisarfiata suliassaraa isiginnaartitsisartunngorniarfik aqqutigalugu isiginnaartitsisartussanik ilinniartitsinissaq.
Erseqqinnerusumik paasissutissat uani takukkit: www.nuis.gl
Eqqumiitsuliornermik Ilinniarfik
Eqqumiitsuliornermik Ilinniarfik Namminersornerullutik Oqartussat/Namminersorlutik Oqartussat ingerlataraat. Ilinniarfimmi ilinniartut assilioriaatsinik ilisimasassanik tunngaviusumik periaatsinillu ilinniartinneqartarput. Eqqumiitsuliornermik Ilinniarfimmi ilinniartut amerlanertigut ilusilersuisartutut assilissanillu eqqumiitsuliortutut ingerlaqqittarput. Eqqumiitsuliornermik Ilinniarfimmi ilinniartuusarneq assilialiornermut ilinniarfimmi, eqqumiitsuliornermut ilinniarfimmi, ilusilersuisarnermut ilinniarfimmi assigisaanniluunniit ilinniartunngornissamut tapiiffigineqarnissamik periarfissiivoq.
Eqqumiitsuliornermik Iliniarfik pillugu paasissutissat erseqqinnerusut uani takukkit: www.sunngu.gl
Kalaallit Nunaanni Eqqumiitsuliortut Kattuffiat KIMIK
Kalaallit Nunaanni Eqqumiitsuliortut Kattuffiat assilialianik eqqumiitsuliortut Kalaallit Nunaanni najugaqartut salliutinnerullugit peqatigiiffiuvoq. Peqatigiiffiup anguniagaa tassaavoq eqqumiitsuliortut soqutigisaannik ilaasortallu saqqummersitsinissaannik assigisaannillu suliaqarnissaq.
Eqqumiitsuliortut kattuffiata KIMIK-up ukiut 15-it piusimanera nalliuttorsiutigalugu 2011-mi aasakkut Nordatlantens Bryggemi Sila qulequtaralugu ilaasortat aqqanillit saqqummersitsipput.
Kalaallit Nunaanni Eqqumiitsuliortut Kattuffiat KIMIK pillugu paasisaqarnerorusukkuit nittartagaq una takuuk: www.kimikart.com
Kulturi pillugu atuagassiaq Neriusaaq
Atuagassiaq Neriusaaq kulturi pillugu atuagassiaavoq oqaatsit marluk atorlugit saqqummersartoq, atuagassiallu anguniagaraa Kalaallit Nunaanni eqqumiitsuliornerup kulturillu killiffii allaaseralugillu paasissutissiissutigisarnissaat. Peqatigiiffimmi Neriusaami inuit soqutiginninnertik tunngavigalugu suliaqartuupput taamaasillutillu aaliangeeqataasinnaallutik akisussaaqataallutillu.
Neriusaaq pillugu paasissutissat annertunerusut takorusukkukkit nittartagaq una takuneqarsinnaavat: www.neriusaaq.gl
Danmarkip aamma Kalaallit Nunaata Kulturimut Aningaasaateqarfiat
Danmarkip Kalaallillu Nunaata Aningaasaateqarfiat kalaallit aningaasaateqarfii pingasuusut, Kulturimut Aningaasaateqarfik Danmark-Kalaallit Nunaat 1996-imeersoq, Kalaallit Nunaat pillugu Aningaasaateqarfik 1959-imeersoq kiisalu Folketingip Kalaallit Nunaannut Aningaasaateqarfia, kattunnerisigut 1. juni 2005 pilersinneqarpoq.
Aningaasaateqarfiup siunertaraa Kalaallit Nunaata Danmarkillu akornanni kulturikkut attaveqarnerit siuarsarnissaat.
Danmarkip aamma Kalaallit Nunaata Kulturimut Aningaasaateqarfiat pillugu paasissutissat erseqqinnerusut ukunani takukkit: www.stm.dk
Atuagakkanik atorniartarfiit
Atuakkanik atorniartarfiit pillugit paasissutissat annertunerusut nittartakkami uani takuneqarsinnaapput: www.katak.g