Suliffissaaleqineq pillugu kisitsisitigut paasissutissanut nassuiaateqarneq naatsunnguaq
Kommunit qaammammut ataasiarlutik suliffissarsiortutut nalunaarsimasunik nalunaarsuisarnerat aamma Naatsorsueqqissaartarfiup sulinernik allattuiffia tunngavigalugit suliffissaaleqisut pillugit kisitsisitigut paasissutissiortoqartarpoq. Sulinerit pillugit kisitsisitigut paasissutissat assigalugit nunani tamalaani ILO-mik, tassa sulisartunut aaqqissuussisimanermi nassuiaatigineqartut malillugit suliffissaaleqineq pillugu kisitsisitigut paasissutissat suliarineqartarput. ILO-mik tunngaveqarluni suliarinerup kinguerivaa paasissutissat nunani allani kisitsisinut sanillunneqarsinnaalernerat. ILO-mi suliffissaaleqisup nalunaarsuinermi suliffeqarsimannginnissaa piumasaqaatigineqartut pingaarnerit ilagivaat. Suliffissaaleqisut qaammammi nalunaarsuiffiusumi suliffeqarsimasutut nalunaarsukkanut ilanngunneqarneq ajorput. Suliffissaaleqineq pillugu paasissutissani taamaallaat inuit najugaqavissut paasissutissanut ilanngunneqartarput.
Suliffissaaleqineq pillugu kisitsisitigut paasissutissat Naatsorsueqqissaartarfimmit ukiumut ataasiarlutik saqqummersinneqartarput, taakku saniatigut qaammatit tamaasa suliffissarsiortutut nalunaarsukkat saqqummersinneqartarput. Saqqummersitat taakku suliffissaaleqineq pillugu kisitsisitigut paasissutissatut isigineqassanngillat tassa suliffissaaleqisut piffissami tassanerpiaq qanoq inissisimanerannik taamallaat takutitsisuusarmata, naatsorsuutini suliffeqannginnermut piumasaqaataasut tunuliaqutarineqarneq ajorput. Allaasarisani tulliuttuni ukiumut suliffissaaleqinermik kisitsisitigut nalunaarusiaq taamaallaat sammineqarpoq.
Najugaqavissut akornanni suliffissaaleqineq
Titartakkami 5.1-mi suliffissaaleqinermut piffissaq apeqqutaasartoq takuneqarsinnaavoq, ukiukkut suliffissaaleqisut amerlanerusarput aasamilu ikinnerusarlutik. Sulineq pillugu kisitsisit killormoortut takutippaat, tassa ukiup ingerlanerani sulisut nikerannginnerusaramik.
Titartagaq 5.1. Suliffissaaleqisut agguaqatigiissillugu qaammammut amerlassusaat kvartalinut immikkoortiterlugit
Najoqqutaq: Kisitsisaataasivik. http://bank.stat.gl/ARNLED4
Nunap immikkoortortaqarfiini suliffissaaleqisut amerlassusaasa assigiinngisitaarnerujussuaq titartakkami 5.2-mi takuneqarsinnaavoq. Nuummi suliffissaaleqisut ikinnerpaajupput, tassani innuttaasut 6 procentisa missaat suliffissaaleqisuullutik, Kangaatsiami, Qaanaami, Illoqqortoormiuni aamma Tasiilami suliffissaaleqisut amerlanerpaajupput, taakkunani suliffissaaleisut innuttaasut 20 procentit missaaniit aallartimmata. 2012-mi qaammammut agguaqatigiissillugu nuna tamakkerlugu innuttaasut 9,84 procentii suliffissaaleqisuusimapput.
Titartagaq 5.2. 2012-mi nunap immikkoortortaqarfiini qaammammut agguaqatigiissillugu suliffissaaleqisut amerlassussat
Najoqqutaq: Kisitsisaataasivik. http://bank.stat.gl/ARNLED4
Titartakkami 5.3-mi inuusuttut nunaqarfinni suliffissaaleqisut ukioqqortunerusunut sanilliullugu amerlanerusut takuneqarsinnaavoq.
Illoqarfinni 18-19-nillu ukiulit akornanni 19,3 procentit suliffissaaleqisuupput nunaqarfinni taamatut ukiullit 28,5 procentii suliffissaaleqisut, illoqarfinni nunaqarfinnilu suliffissaaleqisut ukioqqortusiartortillutik 35-it missaanik ukiullit tikillugit ikiliartorput. Titartakkami aamma takuneqarsinnaavoq nunaqarfinni suliffissaaleqisut illoqarfinni suliffissaaleqisut ukiui apeqqutaannatik suliffissaaleqisunit amerlanerusut.
Titartagaq 5.3. 2012-mi illoqarfinni nunaqarfinnilu qaammammut agguaqatigiissillugu suliffissaaleqisut amerlassussaat
Najoqqutaq: Kisitsisaataasivik. http://bank.stat.gl/ARNLED4
Titartakkami 5.4-mi nunami tamarmi arnat suliffissaqanngitsut angutinit amerlanerulaartut takuneqarsinnaavoq. Arnat armerlanerusut suliffissaaleqinerannut pissutaavoq nunaqarfinni arnat suliffissaaleqisut amerlanerunerat illoqarfinni arnanut suliffissaaleqisunut sanilliullugit. Angutit akornanni illoqarfinni nunaqarfinnilu suliffissaaleqisut naligiippajaaginnarput. Illoqarfinni arnat suliffissaaleqisut angutinut saniullilullugit ikinnerupput.
Titartagaq 5.4. 2012-mi illoqarfinni nunaqarfinnilu arnat angutillu suliffissaaleqisut
Najoqqutaq: Kisitsisaataasivik. http://bank.stat.gl/ARNLED4