Nukissiuuteqarneq
Kalaallit Nunaat 1993-mili namminerisaminik nukissiuuteqalerpoq, taamanili erngup nukinga atorneqalerpoq maannalu aamma eqqakkanik ikuallaavimmit kissap atorneratigut. Kalaallit Nunaanni namminerisamik nukissiorneq annertusiartoraluartoq suli uuliamik annerusumik gasuuliaamik, petruuliumik aamma benzinamik eqqussuinissaq pinngitsoorneqasinnaanngilaq.
2009-mi ukiuni kingullerni arlaqartuni siullermeerluni nukimmik atuineq annikillivoq. Tamanna gasuuliamik innaallagissiornerup kiassarnerullu annikillineranik pissuteqarpoq. Uulia atorlugu nukissiornermi nukip ilarujussua atorneqanngitsoortarpoq, nukip ilaata atorneqanngitsoortarnera pinngitsoortinneqarsinnaavoq erngup nukinga atorlugu nikissiornikkut. 2009-mi erngup nukinga atorlugu nukissiorneq annertuserujussuarmat tamanna pivoq, uulia atorlugu nukissiorneq annikillisinneqarami, tamanna titartagaq 1.1-mi takuneqarsinnaavoq.
2010-mi, 2011-mi 2012-milu uulia atorlugu nukissiorneq annikilleqqippoq. Taamaakkaluartoq nukimmik atuineq tamarmiusoq 2010-mi 2011-milu annertusivoq, tamannalu geologit misissuinerannik pissuteqarpoq, uuliamik misissueqqaarnerit tassani pissutaanerullutik. 2010-mi 2011-milu uuliamik misissueqqaarluni qillerinerit arfineq pingasut pisimapput. Qillerinerit suliallu taakkununnga attuummassuteqartut nunatta ukiumut nukissiamik atuinerata 20 procentianik atuipput.
2011-ip kingorna uuliamik qillerilluni misissueqqaarnerit unitsikkallarneqarput. Tamatuma kinguneraa Kalaallit Nunaata nukissiuutinik atuinerata 2009-mi atuisimanerata nalinganut apparnera. 2012-mi Kalaallit Nunaat nukissiuutinik 9.114 TJ-mik atuisimavoq. 2009-mut sanilliullugu annertunerulaarpoq 2011-mulli sanilliullugu 17,4 procentimik appariarnerusimalluni. Piujuaannartumik nukissiorneq aatsaat taamak annertutigisimavoq, tassa nukissiornerup 14,5 procenterisimammagu.
Piujuartussamik nukissiorneq gassimik silaannarsuarmik kissatsitsilertartumut aamma silaannaap kissakkiartorneranut sunniuteqartorujussuuvoq. Piujuartussamik nukissiornerup annertusinera gassimik silaannarmik kissatsitsilertartumik millisitsisarpoq, nukissiornermik atorneqartartunik mingutsitsisartunik ass. uulianik atuineq millisarmat.
Titartagaq 1.1. Nammineerluni nukiussiorneq aamma nukissiuutinik atuineq
Najoqqutaq: Naatsorsueqqissaartarfik
Nukik piujuartussaq erngup nukinganit imaluunniit seqernup nukinganit pinngortinneqartarpoq. Nukik piujuartussaq silaannarsuarmik kissatsitsisartuunngilaq, co2-millu aniatsitsisuunnani. Ikummatissat ass. orpiit allallu uumassusilimmit pinngortut alliartornerminni silaannarsuarmit co2-mik atuisimasut ikummatissatut atorneqaraangamik co2-mik aniatitsisarput.
Nukimmik atuineq angerlarsimaffinni atuinermut suliffeqarfiillu atuinerinut immikkoortillugu takuneqarsinnaavoq titartagaq 1.2-mi. Titartakkami tassani erserpoq nukimmik imermillu pilersuineq nukimmik atuinerup 30 procenterisimagaa. Atuiffiunerpaap tullerisimavaa nunalerineq, aalisarneq piniarnerlu nukimmik atuinerup 20 procentia taakkunani atorneqarsimavoq. Angerlarsimaffiit nukimmik atuinerup 18 procentianik atuisimapput, assartuineq angallassinerlu, allakkeriveqarneq aamma tele nukimmik atuinerup 15 procentianik atuisimapput.
Innaallagiaq kiassarnerlu nukimmik imermillu pilersuinerup ataaniittut, atuisumut tuttarput nukissionernermi atorneqaratik. Taamaattumik suliffeqarfinni allani nukimmik titartakkami 1.2-mit takutinneqartumit atuineq annertuneruvoq.
Titartagaq 1.2. 2012-mi nukimmik atuineq angerlarsimaffinnut suliffeqarfinnullu immikkoortillugit
Najoqqutaq: Naatsorsueqqissaartarfik