Inuussutissarsiutinut ilinniartitaanerit Suliffeqarnermut Inuussutissarsiutinullu Ilinniartitaanermut Naalakkersuisoqarfiup suliassaqarfiata ataaniipput. Peqqinnissamulli tunngasumik ilinniartitaanerit 1992-mit Peqqissutsimut Avatangiisinullu Naalakkersuisoqarfimmut inissinneqarput, politiitut ilinniartitaaneq politiit pisortaata akisussaaffiatut inissisimalluni.
Kulturimut ilinniartitaanermullu ataatsimiititaliaq Inatsisartut ataani pilersinneqarsimavoq, ilaatigut sulianik inuussutissarsiutinut ilinniartitaanermut tunngasunik suliaqartoq.
Naalakkersuisunut siunnersuisuusartussatut aamma pilersinneqarput Ilinniartitaanermut Siunnersuisoqatigiit kiisalu Piginnaanngorsaqqinnermut Siunnersuisoqatigiit. Piginnaanngorsaqqinnermut Siunnersuisoqatigiit siunertaat tassaavoq inuussutissarsiutinut ilinniartitaanermut piginnaanngorsaqqinneq pillugu Naalakkersuisunut siunnersuinissaq kiisalu suliffeqarnermut aamma inuussutissarsiutinut ilinniartitaanermut tunngasuni suliniutit ataqatigiissarnerulernissaat.
Qitiusumik ilinniarfiit forstanderimit aqunneqarput. Atuarfinnut atatillugu qitiusumik ilinniartitaanermut ataatsimiititaliaqarpoq, ilinniarnerit naammaginartumik qaffasissuseqarnissaat nakkutigalugit qularnaartussaallugit. Qitiusumik Ilinniartitaanermut Ataatsimiititaliaq suliamik ilisimasaqarfiusutut qullersaavoq.
Suliffeqarneq pillugu iluarsartuusseqqinnerup kingunerisaanik kommunit 2006-mi ilitsersuisarfiit Piareersarfinnik taaneqartartut pilersippaat.
Piareersarfeqarnerup siunertaraa suliffissaaleqisut imaluunniit ilinniagaqarniartut ilinniagaqalernissamut imaluunniit suliffeqarnikkut pimoorussillutik peqataalersinnissaannut piareersarnissaat.
Piareersarfiit pillugit paasisaqarnerorusukkuit nittartagaq una takusinnaavat: www.nanoq.gl
Inuussutissarsiutinut tunngaviusumik ilinniartitaanerit tassaapput sanaartornermut saviminilerinermullu tunngasut, niuerneq allaffissornermillu ilinniarneq, inuussutissalerineq, isumaginninneq peqqinnissarlu, ilusilersuinermut tunngaviusumik ilinniarnerit, sullissinernut tunngasumik ilinniarnerit kiisalu innaallagisserinermik tunngaviusumik ilinniarnerit. Ilinniarnerit assigiinngitsunik sivisussuseqarput ilinniarnerup suunera apeqqutaalluni.
Ilinniarfiit ingerlaqqiffiusut pinngortitamik ilisimatusarnermik, inuiaqatigiit pillugit ilisimatusarnermik kiisalu silaqassutsikkit pilersitanik ilisimatusarnermik tunngaveqartuupput sivikinnerusumik sivisunerusumilluunniit ilinniarfiullutik taakku saniatigut ilinniarfiit ingerlariaqqiffiusut suliffeqarfinnut aaliangersimanerusumik ilinniarfiupput. Ilinniarfiit ingerlaqqiffiusut ilaat Kalaallit Nunaanni ilinniarneqarsinnaanngillat, ilinniarfiit ilaat taamaallaat Danmarkimi imaluunniit nunani allani ilinniarneqarsinnaapput. Takussutissiami 1-mi Kalaallit Nunaanni ilinniarfiit taakkulu sunik ilinniakkanik neqerooruteqarnersut takutinneqarput.
Takussutissaq 1
Kalaallit Nunaanni Inuussutissarsiutinut ilinniarfiit
Saviminilerinermik Ilinniarfik, Nuuk
Tassani ilinniartinneqartarput ilaatigut saffiuut, motoorilerisut, svejserisut, nunalerutinik iluarsaasartut, usisaatinik iluarsaasartut, nunakkut angallassissutinik iluarsaasartut, biilinik iluarsaasartut, cykelmekanikerit, timmisartunik iluarsaasartut, marinemotor aamma snescooter mekanikerit, innaallagisserisut, IT-ikiortit, datafagteknikerit, radio-tv-fagteknikerit, elektronikfagteknikerit, automekanikerit, allaffinni atortulerisut, elektrofagteknikerit, film aamma tv produktionsteknikerit assistentillu, quersualerisut assartuisullu, nussugassalerisut, quersuarmi ikiortit aamma assartugaserisut.
Saffiuunut, automekanikerinut, maskinteknik, umiarsuarmi teknik, køleteknik, elteknik aamma automamekanikinut pikkorissartitsisoqarlunilu ilinniartitsisoqaqqittarpoq.
Saviminilerinermik Ilinniarfik pillugu paasisaqarnerorusukkuit nittartagaq una takusinnaavat: www.jernmetalskole.gl
Sanaartornermik Ilinniarfik, Sisimiut
tassunga ilanngullugu Teknikikkut ilinniarnertuunngortoorniarfik
Tassani ilinniartinneqartarput ilaatigut sanasut/pequsiortut, ruujorilerisut,
illunik qalipaasartut aamma qaartiterisut entreprenørillu.
Ukununnga pikkorissaasoqartarpoq: toqqavissanut kuutsiviliorneq, qalialiorneq, teknik atorlugu ussissaaneq, kiassaatinik uuliatortulerineq, paaviaaneq, glasfiberiliineq aamma umiatsianik aserfallatsaaliineq.
Sanaartornermik Ilinniarfik pillugu paasisaqarnerorusukkuit nittartagaq una takusinnaavat: www.sanilin.gl
Niuernermik Ilinniarfik, Nuuk aamma Qaqortoq
Tassani ilinniartinneqartarput ilaatigut niuernerup allaffissornerup iluani assistentit, HHX, akademikerisut ilinniarnerit, nunani tamalaani niuerneq nittarsaanerlu, Aningaasanik nukissanillu aqutsineq, Aningaasaqarnermik Siunnersuineq, IT-mik aqutsineq, inatsisinut tunngasunik suliaqarneq, Serviceøkonom I takornariaqarnermik immikkut sammisaqartoq, aningaasarsiorneq aamma ilitsersuisut.
Niuertarfinni allaffinnilu sulisunut ilinniaqqinnerit aamma akademimerkonomitut pikkorissarnerit kiisalu sulianik sammisunik arlalinnik pikkorissaasoqartarpoq.
Niuernermik Ilinniarfiit pillugit paasisaqarnerorusukkuit nittartakkat uku takusinnaavatit: www.ninuuk.gl aamma www.niqaq.gl
Inuussutissalerinermik Ilinniarfik INUILI, Narsaq
Tassani ilinniartinneqartarput ilaatigut igasut, saqisut, saaffiginnittarfimmiut, nersutinik toqoraavimmi sulisut, iffiortut, iggavimmi ikiortit, cafeteriami kantiinamilu ikiortit aamma akunnittarfinni takornariartitsinermilu ikiortit.
Inuussutissalerinerup iluani nalinginnaasumik inuussutissalerinermik, nioqqutissiornermik avatangiisillu pillugit ilinniaqqinnerit neqeroorutigineqartarput.
Inuili pillugu paasisaqarnerorusukkuit nittartagaq una takusinnaavat: www.inuili.com
Imarsiornermik Ilinniarfik, Paamiut
Tassani ilinniartinneqartarput ilaatigut aalisariutini naalagaassat 1. aamma 3. grad kiisalu kystskipperit.
Imarsiortunut naalagassatullu ilinniarsimasunut arlalinnik ilinniartitsisoqaqqittarpoq kiisalu nuannaariutinik angallataatilinnut yacktskipperinullu atuartitsisoqarluni misilitsitsisoqartarluni.
Imarsiornermik Ilinniarfik pillugu paasisaqarnerorusukkuit nittartagaq una takusinnaavat: www.imarsiornermik.gl
Umiarsuarnik isumaginninnermik ilinniartitaanerit Royal Arctic Line A/S aamma Århus
Eksportakademi imaluunniit Vejle Handelskole suleqatigalugit, Kalaallit Nunaat, Danmark
Tassani ilinniartinneqartarput ilaatigut Shippinngimik ilinniarneq, Akademimerkonomit, Allaffimmiut, IT-Support, Nunalerutinik iluarsaasartut, Quersualerisut assartuisartullu, Saffiuut, Assartugalerisut, Skibsofficerit, Skibsmekanikerit aamma Umiarsuarni igasut.
Perorsaanermik Ilinniarfik, Ilulissat
Tassani ilinniartinneqartarput ilaatigut Perorsaasut, Socialassistentit aamma Isumaginninnermi ikiortit. Perorsaanerup allallu isumaginninnermi perorsaanerup iluani sulisunut allanut ilinniartitseqqinnerit neqeroorutigineqartarput.
Perorsaanermik Ilinniarfik pillugu paasisaqarnerorusukkuit nittartagaq una takusinnaavat: www.pi.sps.gl
Peqqissaanermik Ilinniarfik, Nuuk
Tassani ilinniartinneqartarput ilaatigut Peqqissaasut, Peqqissaanermik suliaqartut, Peqqinnissamut assistentit, Peqqinnissamut ikiortit aamma Portørit annaassiniartartut.
Paaqqutarinninnerup iluani sulisunik ilinniartitseqqinnerit neqeroorutigineqartarput.
Peqqissaanermik Ilinniarfik pillugu paasisaqarnerorusukkuit nittartagaq una takusinnaavat: www.pi.gl
Oqaatsinik Pikkorissarfik, Sisimiut
Tassani ilinniartinneqartarput oqalutsit nuterisullu.
Namminersortunut suliffeqarfinnullu oqaatsitigut pikkorissarnerit oqaatsitigullu atuartitsinerit neqeroorutigineqartarput.
Oqaatsinik Pikkorissarfik pillugu paasisaqarnerorusukkuit nittartagaq una takusinnaavat: www.oqaatsit.gl
Eqqumiitsuliornermik Ilinniarfik, Nuuk
Assilialiornermut ilinniarfinni, eqqumiitsuliornermi ilinniarfissuarni, atisanik ilusilersuinermut ilinniarfinni assigisaannilu ilinniartutut ingerlaqqinnissamut aningaasatigut tapiiffigineqarnissamik qinnuteqarnissamut pisariaqarpoq.
Politiit Ilinniarfiat, Nuuk
Tassani politiit ilinniartinneqartarput.
Politiinik ilinniartitseqqinnerit neqeroorutigineqartarput.
Politiit Ilinniarfiat pillugu paasisaqarnerorusukkuit nittartagaq una takusinnaavat: www.politi.gl/psk
Upernaviarsummi Nunalerinermik Ilinniarfik, Qaqortoq
Savaatilissatut, tunisassiornissamut gartneritut aamma naatitsivinni gartneritut ilinniartitaanerit ingerlanneqarput.
Upernaviarsummi Nunalerinermik Ilinniarfik pillugu paasisaqarnerorusukkuit nittartagaq una takusinnaavat: www.nunalerineq.gl
Ilisimatusarfik, Nuuk
Ilisimatusarfimmi ilinniartitaanerit uku neqeroorutigineqarput Ingerlatsinermik ilisimatusarfik, Oqaluttuarisaaneq, Tusagassiorneq, Inuiaat piorsarsimassusaasalu oqaluttuarisaanerat, Ilinniartitsisunngorniarneq, Inuiaqatigiilerineq, Inunnik isumaginnittut, Oqaatsit, Atuakkialerineq Tusagassiutillu aamma Peqqissaasunngorniarneq.
Ilisimatusarfik pillugu paasisaqarnerorusukkuit nittartagaq una takusinnaavat: www.ilimmarfik.gl
Ilinniarfissuaq, Nuuk
Tassani ilinniartitsisut ilinniartinneqartarput.
Ilinniarfissuaq pillugu paasisaqarnerorusukkuit nittartagaq unga takusinnaavat: www.ilinniarfissuaq.gl
ARTEK Issittumi Ingeniøri, Sisimiut aamma Lyngby
Issittumi teknologi immikkut sammillugu ingeniøritut ilinniarfik.
Issittumi pissutsit pillugit pikkorissarnerit isumasioqatigiinnerillu ingerlanneqartarput.
Issittumi Ingeniøritut ilinniarfik, ARTEK, pillugu paasisaqarnerorusukkuit nittartagaq unga takusinnaavat: www.sanilin.gl