Pisarineqartartut
Piniarnermik inuussutissarsiutillit sunngiffimmilu piniartartut namminneerlutik pisarisimasatik, 1993-mi aallartittumik Aalisarnermut, Piniarnermut Nunalerinermullu Naalakkersuisoqarfimmut nalunaarutigisalerpaat. Pinisarisimasat tamarmik “ukiumoortumik immersugassami” immersuilluni nalunaarutigineqartussaapput.
Pisarineqartut pillugit paasissutissat ukiumoortumik immersuiffissanit pisuupput, taakkulu piniartunit ataasiakkaanit immersorneqartarput. Piniarnermut allagartaq nutaaq tunniunneqartinnagu piumasaqaataavoq piniartup ukiumoortumik immersuiffik piniartup Aalisarnermut, Piniarnermut Nunalerinermullu Pisortaqarfimmut nassiussimassagaa. Tabel 10-mi takuneqarsinnaavoq 2011-mi allagartanik pigisaqartut 81 procentii ukiumoortumik immersuiffik nassiussimagaat. Nannunik, tikaagulliusaanik, tikaagullinnik, aarrinik, tuttunik umimmannillu pisaqartoqarsimatillugu akuersissummik pigisaqartoq immersuiffissamik immikkut ittumik immersuisussaavoq.
Puisi tassaavoq pisarikkajunnerpaaneqartoq. 2011-mi puisit 112.873-it pisarineqarput. Puisit pisarineqartut amerlanersaat natsiullutillu aataarsuupput. 2010-mi natsiit 44.661-it aataarsuillu 60.020-it pisarineqarput, takuuk tabel 11.
Titartagaq 1. Arfernit mikinernit pisat
Malugiuk: Kisitsisit 2011-mi arferit mikinerit (niisat aamma niisarnat) kisitsisitaat kisitsisaagallarput. Qilalukkat qernertat qaqortallu pisaanerisa kisitsisitaat toqqaannartumik pisassarititanut naleqqissuunneqarsinnaanngillat. Pisat amerlassusaannut Tunumi pisat akuutinneqarput, tamaani pisassarititat amerlassusissaat aalajangerneqanngillat. Pisat amerlassusaasa ukiup aallaqqaataaniit decembarip naaneranut nalunaarsugaapput, ukiumulli pisassarititat malinnagit.
Najoqqutaq: Aalisarnermut Piniarnermut Nunalerinermullu Naalakkersuisoqarfik
Niisat pisarineqartartut amerlassusaat ukiunit qulini kingullerni amerleriapiloorsimapput. Qilalukkat qernertat qaqortallu pisarineqartut ikileriarsimapput. Tabel 11-mi takuneqarsinnaapput uumasut assigiinngitsut ukiuni kingullerni arfinilinni pisarineqartut.
Nannut pisarineqartut amerlassusaat 2003 tikillugu amerleriarsimapput 2003-p kingorna nannut pisarineqartut ikiliartulersimapput, takuuk tabel 11. 2006-miit nannunik piniarneq killilersugaalerpoq. Nannut amerlanersaat Avannaani Tunullu avannaani pisarineqartarput, takuuk tabel 12.