NUKISSIORFIIT
Nukissiorfiit maannamut Namminersorlutik Oqartussat ataanni suliffeqarfiuvoq. Nukissiorfiit innaallagissamik, imermik kissamillu tunisassiorlutillu siammarterisuupput.
Nukissiorfiit pillugu nittartakkami uani sukumiinerusumik takuuk: www.nukissiorfiit.gl
Illoqarfinni innaallagissamik imermillu pilersuineq
1993 Utoqqarmiut Kangerluarsunnguani erngup nukinganik innaallagissiorfiup atoqqaartinneqarfia tikillugu innaallagissamik pilersuineq innaallagissiorfimmik dieselimik ingerlanneqartumik ataatsimik imaluunniit kiassaateqarfimmik illoqarfinni tamani siammarterivittalimmik tunngaveqarsimavoq. Illoqarfiit imminnut ungasissorujussuunerat pissutigalugu maannamut illoqarfiit akornanni nuussisarnissamut aningaasaqarnikkut teknikikkullu tunngavissaqarsimanngilaq.
Nioqqutissiornermi aningaasartuutit qaffasipput, innaallagissiorfiit amerlanerit mikigamik, illoqarfiillu tamarmik immikkut sarfaliuummik sillimmateqartiterlutik. Silap pissusaa pissutigalugu atuisut innaallagissamik pilersuinermi sivisuumik qamittoornerit saperpaat.
Illoqarfinni Nukissiorfiit innaallagissamik sarfalersuinerat Titartakkamii 1-mi takuneqarsinnaavoq.
Nuummi sanaartukkat tamanut atugassiat Utoqqarmiut Kangerluarsunnguani erngup nukinganik innaallagissiorfimmit innaallagiatortumik kiassaasersorneqarput.
Titartagaq 1
Illoqarfinni innaallagissiorneq
Najoqqutaq: Nukissiorfiit
Titartagaq 2
Illoqarfinni kiassaaneq
Najoqqutaq: Nukissiorfiit
Nunaqarfinni pilersuineq
Nunaqarfinni pilersuineq illoqarfinnit qularnaateqarneruvoq, tassami innaallagissiorfinnik sillimmatinik pilersitsisoqarsimanngimmat. Pilersuinerup qularnaassusia nunaqarfinni innaallagissiorfiit pingaarnertut pingasunik generatoreqarnerisigut attanneqarpoq. Generatorimik unittoortoqartillugu sinneruttut taakku marluk innaallagissamik pilersuinermik attassiinnarsinnaasussaapput.
Nukissiorfiit akisussaaffeqarfiisa avataanni nunaqarfinni savaateqarfinnilu avinngarusimasuni innuttaasoqarpoq generatorinik angallattakkanik nammineq pigisanik atuisunik.
Nunaqarfinni tamanut atugassamik kiassaasoqavinngilaq. Nunaqarfinni ikittuinnarni pisortat illuutaat ataasiakkaat – tassaakkajuttartut nunaqarfinni illut sulliviit innaallagissiorfimmi motoorinit dieselitortunit imermit nillorsaammit kissamik sinneruttumik pilersorneqartarput, nunaqarfinnili illut amerlanersaat kissarsuummik uuliatortumik qitiusumilluunniit kiassaammit kiassarneqarput.
Imermik pilersuineq
Illoqarfinni annerusumik tatsinit imeqarfinnit kuunniillu imermik pilersuisoqarpoq. Imeq tassanngaanniit imeqarfinnut erngup aqqutaatigoortinneqartarpoq tassanilu salinneqartarluni atuisunut ingerlateqqinneqannginnermini suliarineqartarluni.
Qaanaami ukiuunerani imermik pilersuinerup unittarfiani piffissami tassani nilannik aatsitsinikkut imermik pilersuisoqartarpoq.
Imeq erngup aqqutaa atorlugu imaluunniit sumiiffinni illut imermut tankeqarfigisaanni biilinik imertaatinik siammarterneqartarpoq.
Nunaqarfiit katillugit 51-it ukioq naallugu imermik pilersorneqartarput. Illunik toqqaannartumik imermik pilersuineq qaqutigoorluinnarpoq, imertartarfimmut ataatsimut arlalinnulluunniit imermik pilersuisoqartarmat.
Nunaqarfiit qulingiluat imeqarfilianit imermik pilersorneqarput saliineq tunngaviusumik atorneqarluni.
Saliineq tunngaviusumik pilersuineq pillugu adresse una takuuk: www.mst.dk
Nunaqarfinni imermik pilersuiffiunngitsuni ilaatigut aasaanerani imermut slangilersuinikkut, ilaatigullu puilasunit, kuunnit tatsiniillu imertartoqartarpoq kiisalu nilannik apummillu aatsitsinikkut pisarluni.