Savaateqarneq
Savaateqarneq pingaarnertigut Kalaallit Nunaata kujataani ingerlanneqarpoq. Savaatillit 50-it missaat nalunaarsorneqarput. Savaatillit affaat sinnerlugit immikkoortortaqarfimmi Narsamiipput. Sinneri Nanortallip Qaqortullu immikkoortortaqarfianniillutik. Savaateqarfiit amerlanertigut ilaqutariinnit ataasiakkaanit ingerlanneqarput.
Savaateqarneq tamakkiisuunngitsumik tunisassiornermiit tamakkiisumik tunisassiornermut ineriartorsimavoq. Ukiut ingerlaneranni savaateqarfinni attaveqarnermut tunngasut ineriartortinniarlugit annertuumik aningaasaliiffigineqarsimapput. Ingerlatsinermut nutaanik sanaartortoqarsimavoq, nerukkaatissiarineqartullu annertusineqarsimapput ukiorlunnerani nerisassaqarnissaq qularnaarumallugu.
Titartagaq 1
Savaateqarfiit uumasuutaasa amerlassusii naapertorlugit
Najoqqutaq: Aalisarnermut, Piniarnermut Nunalerinermullu Naalakkersuisoqarfik
2007-ip naalernerani ingerlatallit pingasut 100-it inorlugit uumasuuteqarput. Ingerlatallit mikinerusut ingerlatallit tamarmiusut eqqarsaatigalugit ikiliartorput. Ingerlatat angisuut 500-it sinnerlugit piaqqiortunik savaataatillit malunnartumik amerliartorput, takuuk Titartagaq 1 aamma Tabel 1.
Namminersorlutik Oqartussat tunisinermut tapiissuteqartarput kiisalu savaatillit pilersitsiniarnerannut tapiissuteqartarlutik. 2004-miilli Namminersornerullutik Oqartussat toqoraaviit ingerlannerannut tapiissuteqartarput. Nunalerinermut polikikkikkut suliniutit pisariaqartut pillugit 2004-imi nalunaarusiami missingersuutaavoq toqoraaviit imminnut akilersinnaalissasut savaaqqat toqoraaviliaassassat ukiumut 25-26.000-it tunineqarpata.
Savaaqqat neqaannik tunisassiorneq qaffakkiartorpoq, 2008-mili savaaqqat neqaanik tunisineq appasinnerulaarsimavoq. Savaaqqat neqaat pingaarnerusumik nunatsinni tunineqartarput. 2006-mi savaaqqat neqaat 344 tonsit tunisassiarineqarput, takuuk Titartagaq 2 aamma Tabel 2.
Titartagaq 2
Savaaqqat neqaanik tunisassiorneq
Najoqqutaq: Aalisarnermut, Piniarnermut Nunalerinermullu Naalakkersuisoqarfik
Nittartagaq takuneqarsinnaasoq:
Savaateqarnermut paasissutissat nittartakkami uani takukkit: www.nunalerineq.gl