2025-mi januaarip aallaqqaataani atuisunut akit
2025-mi januaarip aallaqqaataani atuisunut akit naleqqersuutaat tamakkiisoq ukiup siuliani ullormi pineqartumut naleqqiullugu 3,6 pct.-imik qaffariarpoq.
Inuussutissat aamma ineqarneq qaffanneranut sunniuteqarnerpaajupput. inuussutissat 3,6 pct.-imik qaffattoq taamatullu ineqarnermut aningaasartuutit 6,3 pct.-inik qaffattut. Ineqarnermut aningaasartuutit akisunerulerneranut pissutaanerpaajupput kiassarnerup akitsornera aamma ineqarnermut akiliutigineqartartut qaffannerat, akitsuinerit februaarimi 2024-mi aamma januaarip aallaqqaataani 2025-mi pipput. Akitsuinerit ukiup ataatsip iluani pimmata, akit qaffannerannut annertuumik sunniuteqarput.
Atuisunut akit naleqqersuutaat atuisut tamakkiisumik atuinerisa agguaqatigiissinnerannik uuttuuteqarnera eqqumaffigissallugu pingaartuuvoq. Tabel 1-imi uuttuutit takukkit. Taamaasilluni nioqqutissaqarfinni ataasiakkaani akit tamakkerlutik allannguutaat akinut naleqqersuummut tamakkiisumut annertunerusumik sunniuteqarsinnaanngillat, soorlu atuisut ataasiakkaat aamma akit allanngornerat allatut misigisinnaangaat, atuisut namminneq qanoq atuisarneri apeqqutaalluni.
Taamatuttaaq eqqumaffigissallugu pingaartuuvoq 1. januaarimiit 1. juulimut akit qanoq inissisimanerat naleqqersuummi takutinneqarmat, taamatullu piffissap pineqartup iluani akit qanoq allanngortigisimanerannut takussutissaammat. Saqqummersitamilu matumani 2025-mi januaarip aallaqqaataani akit tunngavigineqarput, taamaasilluni januaarip aallaqqaataannit ulloq saqqummersitsivissaq tikillugu akit allannguutaat ilaanngillat.
Titartagaq 1. Atuisunut akit, qaammatit aqqaneq-marluk ingerlanerini qaffariaatit procentinngorlugit, januaarimiit 2021 - januaarimut 2025
Najoqqutaq: https://bank.stat.gl/PRNPRISV Indeks (2008=100)
Atuisunut akit ukiup affakkaarlugit ineriartornerat
Atuisunut akit ukiup affaani kingullermi, piffissami 2024-mi juulimiit 2025-mi januaarimut 1,3 pct.-imik qaffassimapput. Akit qaffannerat ukiup siuliani akit ineriartorneranut assinguvoq, aningaasaqarneq eqqarsaatigissagaanni pisiassat akitsoriartornerat takuneqarsinnaavoq.
Januaari 2024-mit januaari 2024-mut atuisunut akini ukiup affakkaarlugit qaffariaat 2,2 pct.-iuvoq, akit qaffakkiartornerat annikillilaarsimalluni. Kisianni pisiassat pingaarnerit ass. nerisassat aamma ineqarnermut aningaasartuutit akornanni akit qakkiartuinnarput.
Titartagaq 2. Atuisunut akit, ukiup affakkaarlugit allannguutit procentinngorlugit, januaarimiit 2021 - januaarimut 2025
Najoqqutaq: https://bank.stat.gl/PRNPRISV
Nioqqutissat immikkoortitikkat ataasiakkaat ukiumut ineriartornerat
Atuisunut akit naleqqersuutaanut pisisassat assigiinngitsut assigiinngitsunik sunniuteqartarput, pisiassakkuutaat ilaat annertunerusumik oqimaalutaqarput ilaat anngikinnerusumik.
Januaari 2024-mit januaari 2025-mut ineqarneq atuisunut akip naleqqersuutaannut qaffariartitsinerpaajusimavoq, ineqarnermut akiliutip qaffannera aamma sarfamut, imermut kiassarnermullu akiliutit qaffanneri sunniuteqartorujussuupput.
Akerlianik ineqarnermut atortut aamma angerlarsimaffinnut kiffartuussissutit atuisunut akip naleqqersuutaannut appariartitsinerpaajusimapput, taakku 3,1 pct.-imik akikillisimapput. Taakkununnga ilaapput pequtit, angerlarsimaffinni atortorissaarutit (husholdningsapparater) aamma angerlarsimaffinnut atortut taakku atuisunut akinp naleqqersuutaannut annikillisaataalaarsimapput.
Titartagaq 3. Piffissami 2024-mi januaarimiit 2025-mi januaarimut nioqqutissat immikkoortitikkat ukiumut allannguutaat procentinngorlugit
Najoqqutaq: https://bank.stat.gl/PRDPRISV
Malugiuk: Nioqqutissat assigiinngitsut atuisunut akinut naleqqersuummut sunniutaat takuneqarsinnaavoq. Akit nikissimanerat aamma qanoq oqimaalutarneqarsimanersut tassunga apeqqutaavoq.