Kommunit

2023-mi kommunit 7.180 mio. kr.-inik aningaasanik atuisimapput. 2022-mut sanilliullugu kommunit aningaasat atugaat 15,6 pct.-inik qaffasinnerupput. 2022-mi kommunit ingerlatsinernut aamma aningaasaliinernut aningaasat atorsimavaat 6.210 mio. kr.-it. Titartakkami 3.1-imi 2023-mi kommunit aningaasat atugaat suliaqarfinnut immikkoortitat takuneqarsinnaapput.

 

Titartagaq 3.1
Kommunit aningaasat atugaat sulianut immikkoortiterlugit 2023

Najoqqutaq: https://bank.stat.gl/OFNFUNK

 

Kommunit ingerlatsineranni isumaginninnermut suliaat annertunerpaasimapput. Tassunga ilaapput; ilaqutariinnik, inuusuttunik, meeqqanik innarluutilinnik aamma utoqqarnik isumaginninneq, suliffeqarfiit, inissiat, pinaveersaartitsineq il.il. napparsimanermi, innarluuteqarnermi aamma suliffissaaleqinermi aningaasat tunniussat kiisalu inigisamut tapit, peqqissarneq, isumaginninnermi siusinaarluni suliunnaarnersiutit, utoqqalinersiutit il.il. 2023-mi isumaginninnermut aningaasat atorneqartut 3.481 mio. kr.-iusimapput, taakku kommunit aningaasanik atuinerisa 48,5 pct.-erisimavaat.

 

Kommunini ilinniartitaaneq pingaarutillit tullerivaat. Ilinniartitaanermut aningaasat atorneqartut ataaniipput; kommunit atuarfiinik, inuusuttut atuarfiinik, kollegianik, skolehjeminik ingerlatsinerit aamma ilinniarnermut tapit. 2023-mi 1.625 mio. kr.-it ilinniartitaanermut atorneqarsimapput, taakku kommunit aningaasanik atuinerisa 22,6 pct.-erisimavaat.

 

Nalinginnaasumik pisortat kiffartuussineranut aningaasat atorneqartut tassaapput kommunit allaffissornerinik, kommunalbestyrelsinik, nunaqarfiit aqutsisuinik, qinersinernik ataatsimiitsitalianillu assigiinngitsunik ingerlatsinernut atorneqartut. 2023-mi nalinginnaasumik pisortat kiffartuussinerinut 1.181 mio. kr.-init aningaasat atorneqarsimapput kommunit aningaasanik atuinerisa 16,4 pct.-eralugu.

 

Avatangiisit innarlitsaaliorneqarnerinut aningaasat atorneqartut tassaapput eqqakkanik katersinernut aamma erngup atornikup, suliarineqarnerinut iginneqarnerinullu aningaasat atorneqartut aamma eqqakkanik ikuallaaviit, eqqakkanik ulorianartunik tigooraaviit il.il ingerlanneqarnerinut aningaasat atorneqartut. 2023-mi avatangiisit innarlitsaaliorneqarnerannut aningaasat atorneqartut katillugit 196 mio. kr.-iusimapput kommunit aningaasanik atuinerisa 2,7 pct.-eralugu.

 

Suliffeqarnermi ingerlanneqartunut tunngasunut aningaasat atorneqartut tassaapput, nunalerinermut, aalisarnermut, piniarnermut, innaallagissamik kissamillu pilersuinermut, angallassinermut/assartuinermut, suliffeqarfinnut, niuernermut, takornariartitsinernut il.il. tapiissutit. 2023-mi aningaasaqarnermut tunngasunut 329 mio. kr.-it aningaasanik atuiffiusimapput, kommunit aningaasanik atuinerisa 4,6 pct.-eralugu.

 

Inissianut aamma pisortat illuutaanut aningaasat atorneqartut ukununnga atorneqarput; inissianik attartortitsinerni, inissialiornernik, sanaartorfigissaanernik, imermik pilersuinermik, aqqusinerni qullernik, inissianik ingerlatsineq pisortallu illuutaat pillugit ilisimatusarneq aamma ineriartortitsineq. 2023-mi inissiat aamma pisortat illuutaat pillugit aningaasat atorneqartut 82 mio.kr.-iupput kommunit aningaasanik atuinerisa 1,1 pct.-eralugu.

 

Takussutissiami 3.1-mi takutinneqarput kommunit aningaasarsiorneq tunngavigalugu aningaasat atugaat aamma isertaat.

 

Takussutissiaq 3.1
Kommunit aningaasat atugaat aningaasarsiorneq tunngavigalugu agguataarlugit

		2019	2020	2021	2022	2023
		Mio. kr.
1.	Ingerlatsinermut aningaasat atorneqartut ......	5.276	5.459	5.626	5.803	5.978
1.1	Atuinerit katillugit ..........................	4.152	4.264	4.404	4.573	4.691
1.2	Ingerlaavartumik aningaasanik nuussinerit  ....	1.124	1.194	1.222	1.230	1.288
2.	Aningaasaliinermi aningaasat atorneqartut ....	469	581	502	407	1.201
2.1	Pigisanut nalilinnut aningaasat atorneqartut iluarsisat ................................	455	551	467	376	1.201
2.2	Aningaasaliissutinik nuussinerit  .............	14	30	35	31	-
A.	Aningaasat atorneqartut katillugit..........	5.745	6.039	6.127	6.210	7.180
3.	Ingerlatsinermi isertitat .....................	6.002	6.131	6.200	6.517	6.713
3.1	Inuussutissarsiutinit isertitat .................	373	372	372	380	412
3.2	Pigisanit nalilinnit isertitat ...................	17	15	19	22	4
3.3	Ingerlaavartumik akileraarutit ................	3.428	3.518	3.674	3.920	4.035
3.4	Ingerlaavartumik aningaasanik nuussinerit allat	2.184	2.226	2.136	2.195	2.261
4.	Aningaasaliissutinit isertitat ..................	6	-	-	13	-
B.	Isertitat katillugit.........................	6.008	6.131	6.200	6.530	6.713
C.	Ingerlatsinermi sinneqartoorutit (3-1) (sipaakkat tamakkerlugit)..................	726	672	575	714	734
D.	Ingerlatsinermi aamma aningaasaatinit/pigisanit nalilinnit sinneqartoorutit (B-A) (atorneqarsinnaalersut, ilanngaatissat ilanngaatigereerlugit)......................	263	92	73	320	-467

Malugiuk. Naatsorsuutit ataatsimoortinneqarput, taamaattumik ENS 1995 malillugu suliarineqarmata pisortaqarfiit akornanni nuussinerit ilaanngillat. Taamaasilluni 2023-mi Kommunit ingerlatseqatigiiffinnut immikkut inatsisitigut akisussaaffimmik tunineqarsimanngitsunut aningaassaliissutit 34 mio kr.-iusut kisitsisinut paasissutissanut ilanngunneqanngillat.

Najoqqutaq: https://bank.stat.gl/OFNREAU aamma https://bank.stat.gl/OFNREAI

 

2023-mi kommunit aningaasaqarneranni 467 mio. kr.-inik amigartooruteqartoqarpoq. Kommuneqarfik Sermersuumi sanaartorfigissaanermut aningaasartuutit amigartooruteqarnermut pissutaanerupput. Tassunga ilanngullugu oqaatigineqassaaq Kommuneqarfik Sermersuumi sanaartorfigissaanermut sanaartukkanillu iluarsaassinermut aningaasartuutit sanaartornermut nutaanngorsaanermullu aningaasaateqarfimmut ileqqaarutaasimasut atorlugit aningaasalerneqarsimaneri. Kommuneqarfinni amigartooruteqarluni aningaasaliinertut taaneqarluni. 2022-mut sanilliullugu isertitanit akileraarutit annertunerupput. Ingerlatsinermut sinneqartoorutit 2,7 pct.-imik 734 mio.- kr.-inngorlutik annertusipput.

 

Kommunit kiffartuussillutik tapiissutaat (atuinermut aningaasat atorneqartut) 117 mio. kr.-inik qaffappoq 4.691 mio. kr.-ininngorluni, 2,6 pct.-imik qaffalluni. Atuineq annerpaaq kommunini sulisunik akissarsisitsineruvoq, sulisunik akissarsisitsineq 4 mio. kr.-inik qaffassimavoq 2023-mi sulisunik akissarsisitsineq 2.643 mio. kr.-inngorsimalluni. Atuinermut ilaasut allat tassaapput pigisanit nalilinnit aningaasanik atuineq, tunisassiornermi nioqqutissanik kiffartuussinermilu tunisinermilu isertitat peereerlugit atuineq. Tunisassiornermi atuineq 81 mio. kr.-inik qaffappoq 1.881 mio. kr.-inngorlutik.

 

Kommunit aningaasaliineri tassaapput aalajangersimasunut nutaanut aningaasaliinerit aamma pigisanik nalilinnik pisineq tunisinerlu taakku 2023-mi 794 mio. kr.-inik qaffarsimapput 1.201 mio. kr.-inngorlutik 195,1 pct.-inik qaffassimallutik.

 

Kommunit aningaasanik atuinerat isertitanit akileraarutinit aamma Namminersorlutik Oqartussanit tapinit annermik matussuserneqarsimapput. 2023-mi ingerlaavartumik akileraarutit 4.035 mio. kr.-iusimapput, 2022-mut sanilliullugu 2,9 pct.-imik qaffassimallutik. Namminersorlutik Oqartussanit aamma danskit naalagaaffianit ingerlaavartumik aningaasanik nuussinerit 2.261 mio. kr.-iusimapput 2022-mut sanilliullugu 3,0 pct.-inik annertusisimallutik.

 

2023-mi kommunit aningaasat atugaat 2022-mut sanilliullugu 970 mio. kr.-inik procentinngorlugu 15,6 pct.-inik qaffassimapput. Piffissami tassani kommunit isertitaat 183 mio. kr.-inik qaffapput, ingerlatsinermut aningaasat, tassa sipaakkat tamakkerlugit. Atorneqarsinnaalersut, ingerlatsinermut aamma aningaasaliinermut sinneqartoorutit, apparput, 467 mio kr.-inik amigartooruteqarfiullutik.