Najoqqutat

Pisortat aningaasaqarnerat pillugit kisitsisitigut paasissutissani najoqqutat assigiinngitsut Kalaallit Nunaanni pisortat aningaasaqarnerannik naatsorsuutit suliarineqarnerannut ataqatigiissaarneqarlutik atorneqarput. Najoqqutat pingaarnerit tassaapput kommunini naatsorsuutit, nunap karsiata naatsorsuutai aamma qallunaat ministeriaasa aningaasat atugaat Kalaallit Nunaanut attuumassutillit. Taakku saniatigut suliffeqarfiit naatsorsuutaat atorneqarput. Kisitsisit paasissutissat pingaarnerit pigineqanngikkaangata ilanngussat atorneqartarput. Assersuutigalugu pigisanik nalilinnik atuinermik naatsorsuinermi.

 

2018-imili pisortat naatsorsuutaat pisortat ataatsimut kontoplaneqalernerisa kingunerisaannik allanngortinneqarlutik aallartipput. Taamaalilluni piffissaq ungasinnerusoq eqqarsaatigalugu kommunit aamma Namminersorlutik Oqartussat assigiissaarnerusumik kontonut inissiisalissapput.