Taaguutit nassuiaataat

Suliaqarfik: Taaguut taanna Namminersorlutik Oqartussani imaluunniit kommunini atorfeqarnermi suliaqarfinnut taaguutaavoq.

 

Piffissaq tamakkerlugu sulisut: Sulisup piffissaq suliffigisimasaa ukiup ingerlanerani akunnernut suliffissatut isumaqatigiissuteqarfigineqarsimasunut agguarlugu (ukiumut nalunaarsuutit nalingi).

 

Atorfillit amerlassusaat: Ukiumi ataatsimi sulisut amerlassusaat. Ukiup ataatsip ingerlanerani sulisoq ataaseq arlaleriarluni nalunaarsorsimasinnaavoq, suliffinni assigiinngitsuni arlalinni sulisimappat, ataatsimullu kisitsinermi sulisoq ataasiaannarluni nalunaarsorneqassaaq.

 

Suliaqarfik malillugu agguataarineq: Pisortaqarfinni atorfillit pillugit naatsorsuutit Classification of the Functions of Government (COFOG) atorlugu suliarineqarput. Annertunerusumik nassuiaat pisortat aningaasaataat pillugit kisitsisitigut paasissutissani takuneqarsinnaavoq.

 

Akissarsititsisarneq: taaguut sulisut qaammammusiallit akunnermusiallillu immikkoortinneqarnerinut atorneqarpoq

 

Pisortat naatsorsuutaanni agguataarineq (Naatsorsuutit agguataarnerat):

Agguataarineq Namminersorlutik Oqartussat kommunillu naatsorsuiffigisartagaat malillugit suliarineqarput.

 

Isumaqatigiissutinut agguaanneqarneq: Pisortani atorfillit akissarsialerivimmi isumaqatigiissutinut taasanut agguaassimapput, isumaqatigiissutillu taakku isumaqatigiissutinut assigiinngitsunut agguataagaapput.

 

Immikkoortortaqarfiit: Sulisut immikkoortortaqarfimmut atassuserneqarsimapput. Sulisut immikkoortortaqarfiit malillugit agguaanneri akissarsialerivimmi sumiiffinni nalunaarsorsimaneri malillugit naatsorsorneqarput inunnullu nalunaarsuisarfik malillugu naatsorsugaanatik.