Unnerluussineq
Innuttaasut
inatsimmik unioqqutitsinermi politiinut unnerluussisinnaapput.
Unnerluussisoqartillugu politiinit nalilersorneqassaaq pillarneqaataassusamik
pinerluttoqarsimanersoq suliarlu misissuifigalungu aallartinneqassanersoq.
Politiit namminneq aamma suliamik aallartitsisinnaapput.
Pasineqarneq
Unnerluussineq
tunuliaqutaralugu politiit inummik pasisaqarsinnaapput, pineqartup inatsimmik
unioqqutitsisimaneranut pasinninneq naammattumik tunngavissaqartillugu.
Misissuinermi
suliamut uppernarsaatitut takussutissat atorlugit pasineqartup inatsimmik
unioqqutitsisimanera nalilersorneqassaaq, uppernarsaatitullu takussutissat
pineqartup pinerlussimasutut eqqartuussaanissaanut naammannersut aamma
nalilersorneqassalluni. Taamatullu naliliisoqartillugu pasineqartoq
eqqartuussassanngortinneqartarpoq.
Pinerluuteqarsimasutut
aalajangiiffigineqarneq
Pinerluuteqarsimanermi
aalajangiinerit eqqartuussivinni aalajangiinernut kiisalu eqqartuussiviup
avataani aalajangiinernut agguataarsimapput[1].
Eqqartuussivinni
aalajangiineq eqqartuussinermi pisarpoq, pisuutinneqarnikkut imaluunniit
pinngitsuutinneqarnikkut.
Eqqartuussivinni
inuk pisuutinneqarluni eqqartuunneqarpat, pinerluttuliorsimasutut
nalilerneqassaaq, pineqaatissinneqassallunilu. Pineqaatissiinerlu
eqqartuunneqartumut pillaatisiaavoq. Mianersoqqussummik pineqaatissinneqarneq
sakkukinnerpaavoq pineqaatissinneqarsimasunullu isertitsivimmut inissiineq
(paarnaarussaaneq) sakkortunerpaalluni.
Eqqartuussiviit
avataanni aalajangiinerit eqqartuussinermi aaqqissuussinerit avaqqullugit
pisarput, politiinit suliarineqarajunneruttut. Politiit akileeqqussummik
tunniussisinnaapput imaluunniit unnerluussinerup atorunnaarneranik
nalunaarlutik, tamanna pineqartup pinerluuteqarsimaneranik aammalu
pisuutinneqarneranik isumaqarpoq. Suliap uninngatikkallarneqarnissaa aamma
aalangerneqarsinnaavoq. Tamanna pisarpoq uppernarsaatit qanoq inissisimanerat
tunuliaqutaralugit pasineqarneq tunngavissaqanngitsutut nalilerneqarpat,
imaluunniit misissuineq unnerluutigineqartumut pasinninnissamut
kinguneqarsinnaanngippat.
Aalajangiiffigineqarneq
Saqqummersitami
matumani pinerluuteqarsimanerit aalajangiiffigineqarsimasut pineqarput.
Aalajangiiffigineqarneq pinerluttuliorsimanernik arlalinnik tunuliaqutaqarpat,
naatsiorsuinermi tamakkerlutik ilanngunneqarput.
Saqqummersitami
matumani pinerluuteqarsimanermi aalajangiiffigineqarsimasut tamarmik
unnerluussinerit kisitsisitigut paasissutissaanni ilaapput. Aalajangiinermi
ataatsimi pinerluuteqarsimanerit amerlasimappata, pinerluuteqarsimanerit
tamarmik naatsorsuinermi ilanngunneqassapput. Assersuutigalugu aalajangiineq
ataaseq aserorterinermik tillinniarnermillu tunngaveqartoq naatsorsuutini
pinerluttuliorsimanernik aalajangiiffigineqartunik marlunnik naleqarpoq.