Saqqummersitami matumani innuttaasut isertitaasa qaffasissusaat, isertitaqarnerup ilusaa aamma suut isertitsissutaasinnaanersut ersersinneqarput. Saqqummersitami 2021-miit 2025-mut isertitat takuneqarsinnaapput, kisitsisillu pineqartut Kisitsisaataasivimmi 2002-miit aallartittut pissarsiarineqarsinnaallutik.
Isertitat agguataarneqarneri The European Union Statistics on Income and Living Conditions (EU-SILC)-mi maleruagassat malillugit suliarineqarput. SILC EU-p ataani kisitsisitigut paasissutissiornermi suleqatigiiffiuvoq sammisap iluani OECD-mi piumasaqaatinik naammassinnissimasoq, taamaasilluni nunanut allanut sanilliussisinnaanermik isumannaannerulersitsisoq. Tamanna saqqummersitap periaatsimut immikkoortuani annertunerusumik atuarneqarsinnaavoq.
Piffissani 2002-miit 2025-mut Kalaallit Nunaanni isertitat pillugit annertunerusumik paasissutissat Kisitsisaataasivimmi bank.stat.gl -imi nassaarineqarsinnaapput. Tassani uuttuutit assigiinngitsut soorlu ukiut, suiaassuseq, najugaqarfik, inunngorfik aamma ilinniakkap qaffasissusaa tapitartuullugit nammineq toqqartukkanik tabelinik aallertoqarsinnaavoq.
Saqqummersitami
matumani iluarsaassineq
Matumani saqqummersitaq siuliani saqqummersitami kisitsisinik iluarsaassanik imaqarpoq, akileraarutinut nalunaarsuutit atorneqartut ukiuni 2023-mi aamma 2024-mi naqqiissutinik imaqarnerat pissutigalugu. Taamaasilluni annikitsunik nikingasoqarpoq. Piffissani tunngavigineqartuni inuiaqatigiinni ataasiakkaanut akileraartarnermi atukkat allanngorsinnaasarmata siunissami piffissani pineqartuni kisitsisit saqqummertartussat nutaat aamma siuliini saqqummersitat kisitsisaagallartutut tunngavigineqartassapput.
Matumani
saqqummersitami 2025-mi kisitsisini maluginiagassaq
Ukiumi isertitaqarfiusumi 2025-mi akileraartarnermi aamma ilanngaassisarnermilu malittarisassani assigiinngitsunik allanngortoqarpoq. Matumani inummut ilanngaat 48.000 kr.-niit 60.000 kr.-nut annertusineqarpoq, suliffeqarnermi ilanngaat annertunerulerpoq qaammatikkaartumillu tunniuttakkatut Suila-tapinik taallugu allanngortinneqarluni.
Meeqqanut aamma aapparisamut akilersuisuutini (pilersuisussaatitaanermi akilersuutit) aamma aalisariutini umiarsuarnilu sulinermi nerisaqarnermut aningaasartuutinut naliginnaasumik annertunerusunut ilanngaassisarnerit atorunnaarsinneqarput. Taamatullu meeqqanut aamma aapparisamut akilersuutinik tigusisoq tigusaminit akileraartussaatitaajunnaarluni.
Angerlarsimaffimmi paarsinermut akissarsiat, tasiortortumik paarsinermut akissarsiat aamma oqilisaassilluni paarsinermut akissarsiat isertitat B-niit isertitat A-nut allanngortinneqarput, ilanngaassisarnerlu atorunnaarsinneqarluni. Taamaattumik ukiup isertitaqarfiusup 2025-p ukiunut siuliinut sanilliunnerani eqqumaffigineqassaaq ineriartorneq aamma akileraartarnermi ilanngaassisarnermilu malittarisassanik allannguinernik imaqarmat.