Danmarkimit EU-mi nunanut EU-llu avataanut nunanut tunisat
Nunat EU-mi ilaasortat maleruaqqusat assigiinngitsut malillugit nalunaarsuutinik tunniussisarput, avammut tunisinermi EU-mi nunamut tunisisoqarnerani nalunaarusiorneq (intrastat-imik taasaq, avammut tunisisut DST-imut toqqaannartumik nalunaarusioriaasiat) imaluunniit avammut tunisinermi EU-p avataani nunanut tunisisoqarnerani nalunaarusiorneq (extrastat-imik taasaq, akiitsuuserisut tunisisut paasissutissaannik DST-imut ingerlateqqiillutik nalunaarusioriaasiat). 2022 aallarnerfigalungu Danmarkimi tunisisartut Intrastat-imi avammut tunisat nalunaarusiorneranni nioqqutissat suminngaanneerfiannik nalunaaruteqartarneq piumasaqaataalerpoq. EU-lli avataannut avammut tunisinermi nioqqutissat suminngaanneerfiannik nalunaaruteqartarneq kajumissutsimik pisarpoq. Taamaattumik EU –p avataanut avammut tunisat tamakkiisuumik takussutissaat nalorninaateqarput.

Ingerlateqqitassanik niuerneq
2022-mittaaq aamma nioqqutissat ingerlateqqitassat ilanngunneqarput. Tassaallutik nioqqutissat Kalaallit Nunaanniit Danmarkimut apuunneqartut nunamut allamut ingerlaannartumik ingerlaqqittussat.

Nioqqutissap nalinga
Nioqqutissap nalinga Danmarkimi sumiiffimmi annissiviusumi naatsorsorneqartarpoq, tunisisumiit sumiiffimmi annissiviusumut killeqarfimmi imaluunniit umiarsualivimmut nioqqutissamik assartuinermi aningaasartuutit ilanngullugit. Akerlianilli Danmarkimi umiarsualivimmiit tigusisussamut tullermut assartuinermi aningaasartuutit ilaanngillat. Nioqqutissaq piffissami nassiunneqarfissaani tunineqarsimanngippat nioqqutissamut nioqquteqarfimmi akigititaq atorneqartarpoq.

Nuna suminngaanneerfik
Nuna suminngaanneerfik tassaavoq nuna nioqqutissap suliarineqarfia, imaluunniit tamanna nunani marlunni arlalinniluunniit pisimappatillugu nuna suliarineqarfia kingulleq. Nioqqutissap suliarineqareernerata kingorna nunamut allamut ingerlateqqinneqarsinnaasimanngippat poortueqqinneq, immikkoortiterineq akoorinerluunniit nioqqutissamik suliaqarnertut naatsorsorneqanngilaq.

Kalaallit Nunaanneersunik 03-mik ilisarnaatilinnik Kalaallit Nunaannit avammut tunisineq Danmarkimit avammut tunisinermut naleqqiullugu
Naatsorsueqqissaartarfimmi nunanik allanik niueqateqarnermi kisitsisitigut paasissutissani nioqqutissat 01-mik ilisarnaatillit Kalaallit Nunaannit tunineqartut imaluunniit Kalaallit Nunaannit aalisariutinit nunani allani umiarsualivinni tulaanneqartut tamarmik ilaapput. Nioqqutissat Kalaallit Nunaannit aallarunneqarnerini nalingat tunngavigineqartarpoq, assartuinermut sillimmasiinermullu aningaasartuutit kiisalu aningaasartuutit allat ilanngunnagit.
Tabeli 1-imi aamma 2-mi nioqqutissat 03-mik ilisarnaatillit Kalaallit Nunaanneersut, Danmarkimi tunisisartunit Kalaallit Nunaanninngaanneersutut nalunaarutigineqarsimasut, pineqarput. Tassaallutik nioqqutissat 03-mik ilisarnaatillit Danmarkimi suliarineqarsimanngitsut taamaattumillu Kalaallit Nunaanneersutut suli nalunaarsorsimasut. Nunattaaq allat 03-mik ilisarnaasikkanik Danmarki aqqutigalungu avammut tunisisarput, aalisariutit nunanit allanneersut 03-mik ilisarnaasikkanik avammut tunisassanik imaluunniit suliareqqitassanik Danmarkimut tulaassuisarmata.

Kalaallit Nunaannit nioqqutissat 03-mik ilisarnaasikkat Danmarkimiittut
Nioqqutissat 03-mik ilisarnaatillit Kalaallit Nunaanneersut Danmarkimi quersuarnut ilineqarajuttarput, amerlanerillu allanngortinnagit avammut tunineqartarlutik imaluunniit annikitsukkuutaarlugit poortorneqaqqittarlutik. Ilai suliffissuarnukaanneqartarput suliareqqitassanngorlugit imaluunniit Danmarkimi pisiniarfinni tunisassanngorlugit. Nioqqutissat suliarineqartut allatut ilisarnaateqalersinnaapput nunalu suminngaanneerfiat allanngorsinnaalluni, taamaasilluni nioqqutissap suliaralugu piariikkap Kalaallit Nunaanneersuunera allanngussaaq Danmarkiminngaanneersunngorluni.

Kalaallit Nunaanneersut 03-mik ilisarnaatillit suliarineqarnerminni amigaateqarneq kasiilerinerlu peqqutaallutik oqimaassusaat allanngortarput, tamannali aamma pisarpoq nioqqutissaq piariigaq akuutissanik nutaanik akuneqartillugu.

Nioqqutissattaaq nalinga Kalaallit Nunaannit aallarunneqarnermini nalinganut naleqqiullugu aamma allanngortarpoq. Danmarkimut ingerlanerani aningaasartuutinut tapiliussanik, assartuinermi kiisalu sillimmasiinermi aningaasartuutinik peqquteqartumik nioqqutissap nalinga qaffanneqartarpoq, aammattaaq quersuarmik atuinermut, allaffissornikkut ingerlatsinermut sulinermilu akissarsianut aningaasartuutit peqqutaaqataasarput.

Kukkunernut peqqutaasinnaasut
Avammut tunisinermi kisitsisitigut paasissutissani nalinginaasuni kukkunerusinnaasut saniatigut kisitsisitigut paasissutissani matumani saqqummiunneqartuni assigiinngitsunik immikkut kukkusoqarsinnaavoq.

Assersuutigalugu matumani saqqummersuni taaneqarsinnaapput:

Nuna suminngaanneerfik pillugu avammut tunisisunit kukkusumik paasissutissiineq. Akitsuuserisunik suminngaanneerfik pillugu paasissutissat nakkutigineqartannginnerisa ilimanaataat.

EU-p avataanut tunisinermi nunamut suminngaanneerfimmut paasissutissiisoqarnissaata inatsisitigut pisussaaffiunnginnera.

Aalisariutinit Kalaallit Nunaanneersunit nioqqutissat Norgemi imaluunniit Islandimi tulaassat Danmarkimullu ingerlateqqitat Kalaallit Nunaanninngaanneersutut nalunaarutigineqanngeratarsinnaanerat.

Nioqqutissat Canadameersut Kalaallit Nunaanneersutut naatsorsorneqarsinnaanerat. Assersuutigalungu aalisariutit Canadami aalisarsinnaanermut akuersissutillit Kalaallit Nunaannut tulaassinerisa kingunerisaanik.

Kalaallit Nunaata imartaani aalisariutinit Kalaallit Nunaanneersuunngitsunit pisat Kalaallit Nunaanninngaanneersutut nalunaarsorneqarsinnaanerat.