Assartuineq angallassinerlu

Takornariat umiarsuarnut takornariartaatinut ilaallutik imaluunniit nunanut tamalaanut timmisartut aqqutigisartagaat Ilulissat, Kangerlussuaq, Nuuk, Narsarsuaq, Kulusuk imaluunniit Ittoqqortoormiini Nerlerit Inaat aqqutigalugit Kalaallit Nunaannut tikittarput. Kalaallit Nunaannut tikinnermi nalinginnaasumik timmisartumik umiarsuarmilluunniit ingerlaqqittoqartarpoq. Umiarsuit takornariartaatit upernaamit ukiaq tikillugu tikerarfigisarpaat.

Pinngortitami takornariartitsineq nalinginnaasumik aasakkut ingerlanneqartarpoq, ukiuuneranili aamma ingerlanneqarsinnaasunik peqarpoq. Unnuiffigineqarsinnaasut assigiinngiiaarput illoqarfinni akunnittarfinnit bed and breakfastinut, nunaqarfinnilu angerlarsimaffinni illusimaffinnut. Tammaartoqarsinnaavoq, piareersarluarsimanissarli tassani pisariaqarluinnarpoq.

Qeqertarsuup Tunua umiarsuarnit takornariartaatinit ornigarneqarluartuuvoq, Kalaallillu Nunaanni takornariaqartitsinermi ineriartortinneqarluarsimasuulluni. Takornarialerisut amerlanerpaartaat tamaaniipput.

Sorsunnersuup kingulliup nalaani Kangerlussuarmi Narsarsuarmilu mittarfiit Amerikamiunit sakkutooqarfittut sananeqarsimapput, tamatuma kingorna Kalaallit Nunaannut tunniunneqarsimasut. Nunap ilorpasissuani aalaakkaanerusumillu silaqqittartumi inissisimallutik pinngortitami takornariartitsinermut naleqqulluinnartuullutik.

Islandimit Kalaallit Nunaata Kangianut ulluinnarlugu takornariartartut amerlapput. Kalaallit Nunaata Kangia aamma pinngortitami nutaaliaanerusumik takornariaqartitsinermi ornigarneqarluartuuvoq. Ikittuinnaat sermersuaq ituittarpaat, nalinginnaasumik Kangerlussuup Tasiilallu akornanni. Tamanna Namminersorlutik Oqartussanit immikkut ittumik a