Pinerluuteqarsimasut pillugit kisitsisit

Kalaallit Nunaanni eqqartuussisoqarfiit eqqartuussisoqarfinnut sisamanut kiisalu Kalaallit Nunaanni Eqqartuussivimmut avitaapput, tamakkerlutik siullermeerfiusumik sulianik ingerlatsisut. Nunatta Eqqartuussisuuneqarfiani aappassaanneerluni aalajangiiffigisassat ingerlanneqartarput. Eqqartuussisoqarneq suli Kalaallit Nunaannit akisussaaffigineqanngimmat Danmarkimi Højesteret, Kalaallit Nunaat sinnerlugu pingajussaanneerluni aalajangiiffigisassanik ingerlatsivoq.

Kalaallit Nunaata eqqartuussisoqarfiini inuiaqatigiinni akuulersitseqqinnissaq pingaartinneqarpoq. Pineqaatissinneqarsimasut inissiisarfimiinnerminni annerusumik minnerusumilluunniit ulluinnarni inuuneqarsinnaanerminnut periarfissaqartinneqarajuttarput. Kalaallit Nunaat pineqaatissinneqarsimasunut tallimanik isertitsiveqarpoq, illoqarfinni Ilulissani, Aasianni, Nuummi, Qaqortumi Tasiilamilu. Pinerluttuliorsimasut tarnimikkut nappaatillit Nuummi pineqaatissinneqarsimasunut inissiisarfimmut paarnaarussassanngortinneqartarput.

Pinerluttuliortarneq pillugu kisitsisitigut paasissutissat Kalaallit Nunaanni pinerluttulerinermi inatsimmik immikkullu inatsisinik allanik unioqqutitsinernik tunngaveqarput, tassani angallannermut inatsit ilanngullugu. Kisitsisitigut paasissutissat sammisanut assigiinngitsunut immikkoortitigaapput, unioqqutitsinerup unnerluussinermiit ilaatigut pasinninnermut aalajangiiffigineqarnermullu ingerlasarneranik takutitsisunik.