Pinerluuteqarsimasut pillugit kisitsisit

Kalaallit Nunaanni eqqartuussisoqarfiit eqqartuussisoqarfinnut sisamanut kiisalu Kalaallit Nunaanni Eqqartuussivinnut avitaapput, tamakkerlutik siullermeerfiusumik sulianik ingerlatsisut. Nunatta Eqqartuussisuuneqarfiani aappassaanneerluni aalajangiiffigisassat ingerlanneqartarlutik. Eqqartuussisoqarneq Kalaallit Nunaannit suli akisussaaffigineqanngimmat Danmarkimi Højesteret, Kalaallit Nunaat sinnerlugu, pingajussaanneerluni aalajangiiffigisassanik aamma ingerlatsivoq.

Kalaallit Nunaanni eqqartuussisoqarfinni inuiaqatigiinni akuulersitseqqinnissaq pingaartinneqarpoq. Pineqaatissinneqarsimasut inissiisarfimmiinnerminni annerusumik minnerusumilluunniit ulluinnarni inuuneqarsinnaanerminnut periarfissaqartinneqarajuttarput. Kalaallit Nunaat pineqaatissinneqarsimasunut arfinilinnik isertitsiveqarpoq, illoqarfinni Ilulissani, Aasianni, Sisimiuni, Nuummi, Qaqortumi Tasiilamilu. Pinerluttuliorsimasut tarnimikkut nappaatillit Nuummi imaluunniit Danmarkimi pineqaatissinneqarsimasunut inissiisarfinnut paarnaarussassanngortinneqarsinnaasarput. Nunanut Avannarlernut allanut sanilliullugu Kalaallit Nunaanni inunnut ataasiakkaanut pinerluttuliortarnerit annertuumik amerlanerupput.

Pinerluttuliortarneq pillugu kisitsisitigut paasissutissat Kalaallit Nunaanni pinerluttulerinermut inatsimmik unioqqutitsinernik tunngaveqarput, tassani angallannermut inatsit ilanngullugu. Pinerluttuliortarneq pillugu kisitsisitigut paasissutissani takuneqarsinnaavortaaq inatsimmik unioqqutitsinermiit pisup suliarineqarnera, tassa unnerluussaanermiit pasineqarnermut, ilaatigullu aamma pasineqarnermiit aalajangiiffigineqarnermut.