Nukissiorneq

Kalaallit Nunaat qaasuitsup killeqarfiani inissisimavoq, ukiukkut nillertuuvoq sumiiffillu apeqqutaalluni aasakkut issaasattuulluni. Kalaallit Nunaata Avannaa issittuuvoq. Tamaani aasat nillataartuupput seqinerlu kaaviinnartuulluni, ukiukkulli issittarpoq qaammatillu 1-5-it kaperlattarluni. Kalaallit Nunaata Qiterpasissua Kujataalu issinnginnerusumik silaannaqarput, Kalaallit Nunaata Kujataani kangerluit ilorpasissut eqqaassanngikkaanni, tassani issittup kiannerulaartortaani inissisimaneq pissutaalluni annertunngitsumik orpinnik naasoqartarpoq.

Silaannaap nillertuunera peqqutigalugu Kalaallit Nunaat nukissiuutinik annertuumik pisariaqartitsivoq. 1990-ikkunnili erngup nukinganik innaallagissiorfinnik tallimanik sanasoqarpoq, Nuummi, Qaqortumi/Narsami, Sisimiuni, Ilulissani Tasiilamilu innaallagissamik pilersuisunik. Erngup nukinganik innaallagissiortoqalinngikkallarmat nuna tamakkerlugu orsussanit ikummatissat atorneqarput. Illoqarfinni aamma nunaqarfinni minnerusuni inoqarfinnilu avinngarusimasuni suli tamanna atuuppoq. Ullumikkut eqqakkanik ikuallaaviit atorlugit kiassarnermik annikikkaluamik pilersuisoqarpoq.