Aningaasaqarnikkut pissutsit

Aningaasaqarnikkut pissutsinut kisitsisitigut paasissutissat naatsorsuutinik assigiinngitsunik Kalaallit Nunaata aningaasaqarneranut nassuiaatinik imaqarput. Aningaasaqarnikkut qaffasissutsit allanngorarneri tunuliaqutaralugit piffissami kingullermi aningaasaqarnerup ineriartornerata ersersinneqarnissaa siunertarineqarluni.

Tassanilu aningaasaqarnikkut pissutsinut uuttuutit ingerlaavartumik naatsorsukkatut aammalu killiffimmi naatsorsukkatut suliarineqarput. Ingerlaavartumik naatsorsukkat tassaapput qaammammut imaluunniit kvartalimut annertussutsit aningaasalluunniit ataatsimut katillugit kisinneri, killiffimmilu naatsorsukkat tassaallutik ukiup ingerlanerani piffissami pineqartumi assersuutigalungu kvartalip naanerani imaluunniit ukiup affaanut aningaasat killiffiat.

Uuttuutit kavartalikkaartumik qaffasissutsit allanngorarnerinut naatsorsuinermi najoqqutarineqarput kvartalinilu siuliini qaffasissutsit allanngorarnerinut naleqqiullugit naatsorsorneqarlutik. Ataani assersuutitut atorneqartut tassaapput kvartalikkaartumik agguaqatigiissillugu allannguutinut naatsorsuinermi najoqqutarineqartut:

· Nassiussat annertussusaat, nioqqutissanik eqqussuinermut annissuinermullu naatsorsuinermi uuttuutaalluartartoq.

· Aningaasarsianit akileraarutit, suliffeqarnerup iluani pisunik uuttuutaalluartartoq.

· Aningaaserivinnit taarsigassarsiat aningaaserivimmiititaqarnerillu, ileqqaagaqartarnermi kiisalu inunnut ataasiakkaanut ingerlatsivinnullu taarsigassarsititsisarnermi allannguutinik ersersitsisoq, atuinermi aningaasaliinernilu allannguutinut aamma uuttuutaasartoq.