Isumaginninnermut tunngasut

Kalaallit Nunaanni isumaginninnermut tunngasuni Nunani Avannarlerni ingerlaaseq atorneqarpoq. Piumasaqaatit aalajangersimasut naammassineqarsimatillugit innuttaasut Kalaallit Nunaanni najugallit suliffeqannginnermi, napparsimanermi ernereernerullu kingorna isertitanut taarsiissutaasunik ikiorsiissutinik pisartagaqarsinnaatitaapput.

Innuttaasut isertitakitsut imaluunniit isertitaqanngitsut, piumasaqaatinillu naammassinnissimanngitsut taarsiullugu pisortanit ikiorsiissutinik pisartagaqarsinnaatitaapput.

Ilaqutariit isertitakitsut aamma ikiorsiissutinut tapinik soorlu ineqarnermut meeqqanullu tapinik pisartagaqarsinnaatitaapput. Innuttaasut 67-iliineqanngitsut tamakkiisumillu sulisinnaassuseqanngitsut siusinaartumik soraarnerussutisiaqalernissamut qinnuteqarsinnaapput. 67-inik ukioqalernermiit innuttaasut tamarmik utoqqalinermi soraarnerussutisiaqarsinnaatitaapput. Utoqqalinermi kiisalu siusinaarlutik soraarnerussutisiallit angerlarsimaffimmi ikiorneqarnissaminnut paaqqutarineqarnissaminnut imaluunniit utoqqaat illuini inissamik neqeroorfigineqarsinnaapput.

Innuttaasut innarluutillit innarluutaannut ikiuutaassussanik ikiorserneqarnissamik pisinnaatitaapput. Ikiorserneqarnerup suunera innarluutillip pisariaqartitaa malillugu aalajangerneqartarpoq. Assersuutigalugu ulluinnarni tapersersuisumit ikorfartorneqarneq, angalanermi ingerlaqateqarneq imaluunniit piffissaq tamakkerlugu innarluutilinnut inissiisarfimmiinneq. Innuttaasut innarluutillit innarluutilinnut sullivigineqarsinnaasutut nalilersukkani sulinissamut periarfissaqarput.