Aalisarneq piniarnerlu

Aalisarneq Kalaallit Nunaanni inuussutissarsiutit pingaarnersaraat. Kinguppannik, qaleralinnik, saarullinnik allanillu aalisarneq pisassiissutinit aalisarsinnaanermullu akuersissutinit, Namminersorlutik Oqartussanit aalajangersarneqarsimasunit, aaqqissuussaavoq. Aalisariaatsit assigiinngitsut marluupput, avataasiorluni aalisarneq kiisalu sinerissap qanittuani aalisarneq. Sinerissap qanittuani aalisarnermi tulaassuineq atorneqarpoq, avataasiorlunili aalisarnermi kilisaatini aalisariutini aalisakkerineq ingerlanneqartarpoq. Aalisarnermi suliffeqarfiit marluk annerpaat tassaapput Royal Greenland Namminersorlutik Oqartussanit pigineqartoq aamma namminersorluni suliffeqarfik Polar Seafood. Royal Greenland Kalaallit Nunaanni suliffeqarfiit annersaraat. Ukiuni marlussunni kingullerni aalisarnermi suliffeqarfiit namminersortut minnerusut aamma aallarterarnikuupput.

Kalaallit Nunaanni piniarneq kinguaariippassuarni inuuniutaasimavoq, ullumikkuttaarlu ilaqutariit aningaasaqarnerannut tapertaasarpoq pingaarutilik. Ukiup ilaani piffissat piniarfiusartut malillugit piniarsinnaanermullu allagartat malillugit piniarneq ingerlanneqarpoq. Piniarusuttunut tamanut nalinginnaasumik piniarnermut allagartamik peqaqqaarnissaq piumasaqaataavoq. Piniarnermut allagartat assigiinngitsut marluupput, sunngiffimmi pinialussinnaanermut aamma inuussutissarsiutigalugu piniarnermut allagartaq. Taassuma saniatigut piniagassanut pisassiissutinit aqunneqartunut immikkut ittumik akuersissutinik peqarpoq. Pisassiissuteqartarnikkut ukiut tamaasa uumasut qanoq amerlatigisut pisarineqarsinnaanerat aqunneqartarpoq. Inuussutissarsiutigalugu piniarnermut allagartallit piniarnerinnavimmik inuuniuteqartuaannanngillat, inuussutissarsiornertilli aasaanerani umiatsiaararsorluni aalisarnermik ukiukkullu sikumi aalisarnermik tapertaqartikkajuppaat.

Puisi piniagassaavoq suli pingaarutilik. Nalinginnaasumik amia tunineqartarpoq, neqaa nerineqartarpoq imaluunniit kalaallit qimmiinut qimmeqarfiusuni nerukkaatissatut atorneqartarluni. Puisit amiinit tunisat affaasa missaanniittut Kalaallit Nunaanni kisiartaalluni ammerivimmi, Great Greenlandimi, mersugassianngorlugit piareersarneqartarput. Arferit assigiinngitsut aalajangersimasut pisassiissutit malillugit piniarneqarsinnaapput. Arferit neqaat mattaallu Kalaallit Nunaanni kisimi nerineqartarput. Tuttut umimmaallu nunamiutani piniarneqarsinnaasuni pingaarnerpaapput. Savat savaaqqallu Neqi A/S-imi toqorarneqartarput. Timmissanik piniarneq pisassiissutit malillugit ingerlanneqartarpoq. Timmissalli piniarneqarsinnaasut ilaannut pisassiissuteqartarneq atuutinngilaq. Nalinginnaasumik politiit piniarnermut inatsimmik atuutsitsisuupput.