Takornariaqarneq

Nunanut tamalaanut timmisartut aqqutigisartagaat Ilulissat, Kangerlussuaq, Nuuk, Narsarsuaq, Kulusuk aamma Ittoqqortoormiini Nerlerit Inaat aqqutigalugit imaluunniit umiarsuarnut takornariartaatinut ilaallutik takornarissat tikittarput. Kalaallit Nunaannut tikinnermi timmisartumik umiarsuarmilluunniit ingerlaqqittoqartarpoq.

Unnuiffigineqarsinnaasut assigiinngiiaarput; illoqarfinni akunnittarfinniit bed and breakfastinut nunaqarfinnilu angerlarsimaffinni illusimaffinnut. Tammaartoqarsinnaavoq, piareersarluarsimanissarli tassani pisariaqarluinnarpoq.

Qeqertarsuup Tunua umiarsuarnit takornariartaatinit ornigarneqarluartuuvoq akunnittarfigissuulluni, Kalaallillu Nunaanni takornariaqartitsinermi ineriartortinneqarluarsimasuulluni. Takornarialerisut amerlanerpaartaat tamaaniipput. Sorsunnersuup Kingulliup nalaani Kangerlussuarmi Narsarsuarmilu mittarfiit Amerikamiunit sakkutooqarfittut sananeqarsimapput, kingorna Kalaallit Nunaannut tunniunneqarsimasut imarpik qulaallugu timmisartuussinernut atorneqarput. Nunap ilorpasissuani aalaakkaanerusumillu silaqqittartumi inissisimallutik. Pinngortitami takornariartitsinermut naleqqulluinnartuullutik. Island-imiit Kulusummut ulluinnarlugu takornariartartut amerlapput. Kalaallit Nunaata Kangia aamma pinngortitami nutaaliaanerusumik takornariaqartitsinermi ornigarneqarluartuuvoq. Ikittuinnaat sermersuaq ituittarpaat, nalinginnaasumik Kangerlussuup Tasiilallu akornanni. Tamannali Namminersorlutik Oqartussanit immikkut ittumik akuerineqaqqaartariaqarpoq. Pinngortitami takornariartitsineq aasakkut ingerlanneqarnerusarpoq, ukiuuneranili aamma ingerlanneqarsinnaasunik peqarpoq. Umiarsuillu takornariartaatit nalinginnaasumik upernaamiit ukiaq tikillugu tikerartarput.